Partitë opozitare dorëzuan një ditë më parë mandatet e deputetëve, si një akt ndaj një Parlamenti që, sipas tyre, nuk është vullnet i qytetarëve, por i ndikimit të bandave që kanë manipuluar zgjedhjet. Opozita kërkon largimin e kryeministrit Edi Rama, dhe krijimin e një qeverie tranzitore që do të bëjë të mundur organizimin e zgjedhjeve të lira dhe të ndershme.
E ndërsa sot, kryetari i Partisë Demokratike, Lulzim Basha, ka kërkuar në mbledhjen e Kryesisë që të mos harxhohet asnjë minutë kot, por të ngrihen grupet e punës.
Po kështu, Kryesia e Partisë Demokratike e mbledhur pasditen e sotme ka vendosur të përjashtojë nga partia Myslym Murrizin.
Murrizi është i vetmi deputet i PD-së, që nuk pranoi të djegë mandatin, duke dalë kundër vendimit të grupit të tij parlamentar që firmosi dorëzimin e mandateve. Sipas PD-së, kjo është thyerje e vendimit të grupit, dhe nuk mund të tolerohet.
Mbetet enigmë se çfarë do të bëjë Rudina Hajdari, e cila gjendet jashtë vendit dhe ende nuk ka firmosur aktin e dorëheqjes nga mandati i deputetit. Ajo ka thënë se do të flas kur të kthehet në Shqipëri.
