Vijojnë hetimet për zbardhjen e vrasjes së ndodhur në Sharrë, ku u gjet e vrarë 49-vjeçarja Lirie Xhepa. Policia ka shpallur në kërkim Dashamir Xhepën, kunatin e viktimës, i cili dyshohet se është autor i krimit.
Policia po heton në disa pista, ndërsa gjatë kontrollit në banesë, Dashamir Xhepa nuk është gjetur aty. Po ashtu, nuk përjashtohet edhe një lidhje intime mes viktimës dhe kunatit të saj që dyshohet se ka kryer vrasjen.
Gruaja humbi gjurmët mbrëmjen e djeshme, teksa nuk është kthyer më në shtëpi, ndërsa djemtë e saj shkuan mëngjesin e sotëm në komisariatin numër 6 për të denoncuar zhdukjen, ku morën edhe lajmin se nena e tyre ishte ekzekutuar.
Trupi i viktimës është gjetur përmbys dhe e veshur lehtë, jo me xhup. Mësohet se gruaja ishte e martuar dhe banonte pranë zonës ku u gjet e vrarë dhe e hedhur në ferra. Banorët thonë se kanë parë njerëz me makinë në këtë zonë.
