Një shqiptar nga Maqedonia ka humbur jetën pas një përleshjeje të ashpër në shisha barin “Weelax” në Regau (rrethina Vöcklabruck). Besar N., 29 vjeçar, mori plagë të rënda pasi u plagos me thikë, duke humbur më pas jetën.
Sipas mediave austriake, viktima ishte i martuar dhe kishte dy fëmijë të vegjël, një vajzë tetëvjeçare dhe një djalosh katërvjeçar. Dyshohet se vrasja ka ndodhur pas grindjeve familjare, ndërsa mendohet se në mesin e sulmuesve kanë qenë dy shqiptarë.
Një thikë është gjetur nën një veturë jashtë lokalit, përcjell Albinfo.ch. Por, dyshohet se ajo nuk është arma me të cilën është kryer krimi. Sipas prokurorit Christian Hubmer, në ngjarje mund të jenë përdorur disa thika. Të dielën, janë arrestuar dy persona të dyshuar se kanë lidhje me krimin.
Sikurse ka pohuar Walid H., pronar i lokalit në fjalë, ai kurrë nuk i kishte parë më parë në restorantin e tij këta persona.
Prindërit e viktimës ende jetojnë në Maqedoni. Viktima 29-vjeçare, që bashkë me vëllanë e tij menaxhonte një kompani në Attnang-Puchheim, u varros atje. Megjithatë, hetimet policore po vazhdojnë me intensitet të plotë.
