Tensionohet më shumë situata mes familjes së Mark Gjonit dhe italianit që i vrau të birin, sidomos pas publikimit të një lajmi të djeshëm se pajtimtari Nikoll Shullani ishte zotuar të pajtonte gjaqet.
Duket se Shullani ka lëshuar një deklaratë të tillë, pa kontaktuar fare me familjen e emigrantit të vrarë.
Ditën e sotme, Mark Gjoni ka mohuar të ketë kërkuar para për të falur gjakun e djalit të tij:
“Kjo nuk është e denjë për një malësor. Si mund të shes unë gjakun e tim birit. Unë nuk e kam çuar në Itali për ta shitur”, shprehet Gjoni për BalkanWeb.
Babai i emigrantit të vrarë nuk kursen akuzat mbi pajtimtarin, Nikoll Shullani, i cili udhëtoi drejt Italisë për ndërmjetësim pa kontaktuar fare me familjen.
“Si mundet të shkojë Nikoll Shullani në Itali dhe të flasë për pajtim pa kontaktuar fare me familjen dhe as me mua. Nikoll Shullanin unë e kam njohur vetëm ditën që më ka ardhur në shtëpi me gazetarin italian”.
Më tej, ai komenton deklaratën se kishte kërkuar para në këmbim të gjakut të djalit:
“Kur e kam parë mbrëmë në media, aq i kënaqur kam qenë se edhe po t’i kisha vrarë të tërë, hasmin italian, gazetarin dhe Nikoll Shullanin, aspak i kënaqur nuk kamë qenë,” shprehet në zemërim e sipër malësori, i cili konsideron se i është prekur dinjiteti i familjes.
Mark Gjoni i bindur se dikush me gjakun e të birit po kërkon të bëjë pazare ka dhe një apel për hasmin.
“Nëse arrij të vërtetoj se dikush ka marrë para për këtë çështje, mua më ka gjakun borxh, por dhe do ta denoncoj në polici. I kërkoj dhe vrasësit të tim biri, të tregojë nëse ka paguar dikund para për këtë çështje”.
