Nga qyteti i Korçës, Rama ka kërkuar ndjesë për të gjithë fjalorin banal që përdoret në Kuvend. Dy javët e fundit, Parlamenti është kthyer në një vend ku etika mungon, e ndërsa klasa politike mbrohet duke përdorur një fjalor rruge. Sot kryeministri Rama nisi nga Korça takimin e parë publik. të ciklit kombëtar “Bashkia që duam”. Duke përfituar nga rasti, ai iu rikthye një teme mjaft të nxehtë, e cila ka të bëjë me fjalorin banal që përdoret nga deputetët.
“Ne nuk kemi problemin si të zgjidhemi, ne kemi problemin si të vazhdojmë të garantojmë që qytetarët të fitojnë më shumë. Ka një shprehje të bukur që thotë; “Fituesit merren me fitoren, humbësit merren me fituesin”.
Ne merremi me si do të fitojmë përsëri për të fituar më shumë qytetarët, ata merren me ne gjithë kohës. Unë ju kërkoj ndjesë për mëkatet tona të të enjtes, sepse ‘kush fle me qenin, gdhihet me pleshtin’.
Ditën e enjte, duam apo nuk duam, shkojmë dhe futemi te ajo kasollja e qenve. Kështu që duam apo nuk duam, përzihemi edhe ne me ta dhe nganjëherë dukemi edhe ne si ata.
Por një gjë është e sigurtë. Ne nuk jemi si ata. Ne jemi ndryshe”, tha ai.
