Prej 1 janarit në kryeqytet është e vështirë të gjesh pika bastesh të hapur, madje e pamundur. Shumë prej këtyre bizneseve janë kthyer në bar-kafe, ndërkohë të tjera kanë mbyllur qepenat.
Por, edhe pse qytetarët të cilët luanin në këto pika bastesh kanë qenë të shumtë, ata shprehen për Tirana Today se ky ishte një vendim shumë pozitiv. Madje për disa ishte i vonuar, pasi “sëmundja e bixhozit” siç edhe ata e cilësojnë, ka shkatërruar jetën e shumë njerëzve.
“Është shumë gjë e mirë ky vendim. Është çliruar qyteti dhe le të shpresojmë se kështu do të ndodhë dhe me ata që kanë qenë të varur nga pikat e basteve.”
“Unë nuk kam luajtur ndonjëherë, por kam dëgjuar që shkonin shumë fëmijë. Ndaj ishte e nevojshme marrja emergjente e masave. Nisi mbarë viti. Këta që ishin të varur, si legenë kanë qenë dhe do të mbeten më keq.”
“Kam vënë shumë rrallë skedina, si gjithë të tjerët. Dhe shuma më e madhe që mund të kem vënë ka qenë 10 mijë lekë të vjetra, por përsëri nuk kam fituar asnjëherë asgjë. Ata që janë të varur pas tyre, tani janë duke i harxhuar lekët me ilaçe.”
Të ndodhura në katet e para të pallateve, pikat e basteve ishin shndërruar në një shqetësim real për banorët, në jetën e tyre të përditshme. Kjo pasi rrezikonin edhe fëmijët, të cilët tundoheshin dhe hynin shumë lehtë.
“Sa familje janë vrarë, sa njerëz janë vetëvrarë e kanë hyrë në dhe nga bixhozi. Gjysma e shqiptarëve dhe sot e kësaj dite janë në borxhe. Nuk ka logjikë, të zbresësh nga pallati apo fëmijët dhe në krahë të djathtë të jetë një kazino e në krahë të majtë një loto. Askush nuk ka dalë i fituar apo i qeshur nga kazinotë. Fati nuk janë pikat e basteve, por fati janë veç duart. Po punove do fitosh.”
Ndërkohë, janë edhe ata qytetarë të cilët e konsiderojnë këtë veprim si të nxituar. Janë ata të cilët prej kohësh kanë qenë frekuentues të rregullt të lotove. Dhe sot, nuk dinë si t’i kalojnë orët e ditës. Teksa një qytetar thotë për Tirana Today me nota humoristike se tani me mbylljen e pikave të bastit, do t’i kushtojë më shumë rëndësi femrave.
“Ishte një vendim pak i nxituar, sepse nuk është momenti. Unë kam luajtur për qejf, sepse janë sporte që nuk fiton, pasi gjithë komanda është nga brenda. Kurse me skedinat është më ndryshe, mjafton të jesh njohës i mirë i futbollit. Unë kam fituar disa herë nga 100-500-600 mijë lekë të vjetra. Ashtu siç i kam marr, i kam lënë prapë. Tani që u mbyllën ato, ditën e shtyjmë të ulur në kafe.
Kurse unë tani do t’i kushtoj më shumë rëndësi femrave, se i kam lënë pak pas dore. Pasi merresha gjithë ditën me skedina e nëpër pika bastesh.”
Teksa qeveria u la afat pronarëve të lotove sportive deri në fund të vitit 2018, që të mbyllnin bizneset, këto të fundit duket se kanë marr masat për të vazhduar biznesin. Por, tanimë në Kosove apo Maqedoni, ku biznesi i kumarit është ende i ligjshëm./ TIRANA TODAY
