Nga Anxhela Ferra
Si çdo vit tjetër, edhe këtë vit qytetarët ankohen për çmimet larta. Pas përfundimit të festave të fundvitit, ata shprehen se shpenzimet e kryera ishin shumë të shtrenjta. Ndonëse jemi një nga shtetet me të ardhurat më të ulëta për frymë, Shqipëria është një nga vendet me çmimet më të larta të ushqimeve në Evropë.
Madje sipas Eurostat, vendi ynë është më i shtrenjtë se Serbia apo Mali i Zi, sa i përket çmimeve të ushqimeve. Sipas konsumatorëve rritje më të ndjeshme kanë pësuar frutat dhe perimet, teksa thonë për Tirana Today se me pagat e tyre e kanë shumë të vështirë të blejnë dhe produktet e domosdoshme.
“Çmimet sa vijnë edhe rriten, rrogat janë shumë të ulëta, varfëria është shtuar më shumë. Ka njerëz që nuk janë në punë fare dhe nuk kanë asnjë lloj të ardhure. Ndërkohë ne që jemi më mesatar, edhe pse kemi pak më tepër mundësi, përsëri na duhet të shtrëngohemi.”
“Edhe për një familje mesatare ishte pak e vështirë ta përballojë tryezën e Vitit të Ri. Kjo pasi çmimet janë të shtrenjta, na lanë përtokë. Veçanërisht në fundvit, që rriten akoma dhe më tepër.”
“Gjithmonë kur vijnë festat, çmimet janë diçka më shtrenjtë. Dhe neve na mbetet vetëm të kursehemi gjatë vitit, për të festuar në fundvit. Por, çmimet e çdo produkti janë ngritur. Këtë gjë e sheh dhe në mallrat e konsumit të përditshëm, si domate apo kastravecë. Madje edhe qepët, po shihja që ishin më shtrenjtë se zakonisht. Çmimet i kemi si në Evropë, por jetojmë në Shqipëri.”/ TIRANA TODAY
