Londër (CNN)/ Britania mund të ndalojë njëanshmërisht procesin formal të largimit nga Bashkimi Evropian, deklaroi gjykata Europiane e Drejtësisë.
Javën e kaluar Gjykata Evropiane e Drejtësisë mbështeti me një deklarim zyrtar legjitimitetin e faktit se Britania e Madhe e ka fuqinë të tërhiqet nga vendimi për t’u larguar nga Bashkimi Europian edhe nëse shtetet e tjera anëtare mund të mos jenë dakord.
Britania e Madhe mund të tërhiqet para se marrëveshja e negociuar mes saj dhe BE-së të hyjë në fuqi, tha Gjykata Evropiane e Drejtësisë. “Mbretëria e Bashkuar është e lirë të heqë në mënyrë të njëanshme njoftimin për qëllimin e saj për t’u tërhequr nga BE,” vendosi gjykata.
Veç të tjerave, Britania e Madhe do të jetë në gjendje të ruajë marrëveshjet aktuale me BE, të cilat përfshijnë një zbritje të kontributeve financiare, kontrolle të ndryshme të zonës kufitare Shengen dhe mos anëtarësim në Euro.
“Një revokim i tillë, i vendosur në përputhje me kërkesat e saj kushtetuese kombëtare, do të kishte efekt që Mbretëria e Bashkuar të mbetet në BE nën kushte të pandryshuara sa i përket statusit të saj si një shtet anëtar”, tha gjykata.
Gjykimi i kryer me përparësi erdhi një ditë përpara se Dhoma e Përbashkët do të votojë për marrëveshjen Brexit të kryeministres britanike Theresa May, një votim që parashikohet të humbasë shumë mbështetës.
Kryeministrja Theresa May ka thënë gjithmonë se qeveria e saj nuk do të ndryshojë vendimin për t’u larguar nga BE. Por nëse ajo humbet votën dhe qeveria e saj rrëzohet, vendimi i jep parlamentit të Mbretërisë së Bashkuar një mundësi tjetër për t’u larguar nga procesi i Brexit.
Ministri britanik i Mjedisit, Michael Gove, i tha BBC se Britania e Madhe do të largohet nga BE sido që të vendosë Gjykata Europiane e Drejtësisë. “Ne votuam shumë qartë – 17.4 milionë njerëz dërguan një mesazh të qartë se donin të largoheshin nga Bashkimi Evropian”, tha Gove, një aktivist i shquar i Brexit.
Rasti, i sjellë nga aktivistët pro-qëndrimit në Skoci, u kundërshtua ashpër nga qeveria britanike, e cila pa sukses argumentoi se Gjykata e Lartë në Londër duhet të ndërhynte përpara se të shkonte në Evropë.
Rasti tani do të kthehet në gjykatën e lartë të Skocisë dhe gjykatën e Sesionit në Edinburg (gjykata Civile Supreme e Skocisë), për një vendim përfundimtar./TIRANA TODAY/
