Kosova ka qenë e rëndësishme për Serbinë jo thjesht si një territor shtesë, por për pasuritë e saj të mëdha natyrore, kryesisht ato minerale. Minierat e Trepçës në komunën e Mitrovicës, cilësohej si një ndër motorët e ekonomisë jugosllave dikur, me 21 mijë punëtorë të punësuar.
Ato përmbajnë sasi të mëdha ari, argjendi, plumbi, zinku etj, që sot kanë një vlerë të madhe në tregun ndërkombëtar. Gjatë viteve 1945-1990, nga Trepça janë nxjerrë 10.710 kg ar i cilësisë së lartë, dhe mijëra ton argjend.
Vetëm Trepça mendohet se ka mbi 85 miliardë dollarë në pasuri nëntokësore. Ndërkohë CIA amerikane në raportet e saj, pretendon se pasuritë nëntokësore të Kosovës vlejnë deri në 500 miliardë dollarë, duke përfshirë rezerva shumë të mëdha të qymyrgurit.
Për shumë analistë, kjo është arsyeja kryesore e interesit të fortë të Shteteve të Bashkuara në Kosovë, ku ajo ka ngritur bazën më të madhe të saj ushtarake në Ballkan. Ideja e presidentëve Aleksandër Vuçiç dhe Hashim Thaçi, për një shkëmbim territoresh, e ka vënë në rrezik serioz një pjesë të kësaj pasurie, dhe jo vetëm.
