Prej kohësh karburantet me në veçanti naftën janë një problem në Shqipëri. Teksa përdoruesit e automjeteve çdo ditë e më tepër ankohen për cilësi jo shumë të mirë, çmimi sa vjen edhe rritet.
Drejtori i Qendrës Shqiptare të Kërkimeve Ekonomike, Zef Preçi në një intervistë për Tirana Today thekson se ky sektor është një prej më të korruptuarve në vend.
“Menaxhimi i sektorit të nxjerrjes dhe përpunimit të naftës është dëshmi e korrupsionit dhe abuzimeve me asetet publike. Duke nisur nga koncesionet që nuk sjellin të ardhura, deri tek përpunimi i cili lihet në dorën e bandave. Kanë akumuluar një borxh që llogaritet midis 100-200 milion eurove, të pa mbledhura.
Me cilësinë bëjnë përzierje, duke përfshirë naftën e Ballshit. Dhe nga ana tjetër ka abuzime me sasinë, sepse një pjesë kanë pajisje të pa kolauduara. Dhe njëkohësisht entet përkatëse, Inspektorati Qendror Teknik apo institucione të tjera publike nuk përmbushin siç duhet detyrimin e tyre.”
Gjatë muajit Tetor në të gjitha tregjet ndërkombëtare çmimi i naftës ka rënë me 10 Dollarë për ton ndërkohë, që në Shqipëri ndodhi e kundërta pasi çmimi u rrit me të paktën 10 Lek për litër. Një lajm ky i konfirmuar dhe nga Konfindustria Shqiptare.
“Nafta që tregtohet në tregun e brendshëm i referohet bursës. Por, këtu çdo rritje në bursë reflektohet ne tregun e brendshëm, mirëpo nuk ndodh kurrë që kur shkon në krahun e kundërt. Pra, kur çmimi i bursës të bjerë, të ulet dhe çmimi. Nga ana tjetër nuk ka një analizë të kostove krahasuese të këtyre taksave që imponohen. Të cilat në thelb e bëjnë vendin më pak konkurrues.”
Teksa shqiptarëve u duhen mesatarisht 10.3% të të ardhurave ditore për të blerë një litër benzinë, popujve të tjerë si francezëve u duhen vetëm 1.3% e të ardhurave ditore. Por, përsëri këta të fundit kanë paralizuar shtetin me protesta kundër rritjes së çmimit.
“Qeveria jonë i ka duar e lira, mund të bëjë çfarë të dojë. Sepse nuk ka sindikata apo shoqëri civile. Sigurisht që nuk mund të krahasohemi me Francën. Ndërkohë është fakti që në Shqipëri, një pjesë e mirë e të ardhurave ditore shkon për të mbuluar shpenzimet e karburantit. Nëse do të kishim një transport publik të mirë organizuar, nuk do të ishte nevoja të përdorej kaq masivisht makina. Pasi Tirana është një qytet i vogël dhe pse ka 1 milion banorë.
Nëse qeveria do të sigurojë politika që të rrisin shkallën e përpunimit të naftës në vend dhe të kemi proshim nafte me cilësi të mirë; Shqipëria mund të ishte një nga vendet me çmimin më të ulët në Evropë. Shqipëria mundet dhe duhet të ketë një çmim më të ulët, minimalisht të krahasueshëm me vendet e rajonit.” TIRANA TODAY
