Banorët e zonës së Astirit në kryeqytet, janë sot në ditën e 7-të të protestës së tyre, kundër prishjes së banesave në kuadër të projektit të unazës së madhe. Banorët të rebeluar kanë thënë se kanë humbur punën, e tashmë po humbasin edhe shtëpinë.
Shumë prej tyre shprehen se më mirë do të zgjidhnin vdekjen, sesa të mbeteshin pa shtëpinë e tyre. “Na ka humbur edhe puna, edhe shtëpia dhe qetësia jonë. Ne kemi ardhur me ndryshimet demokratike. Nuk jemi kundra fare rrugës, po ne duam pjesën tonë. Kjo është e tmerrshme, po na vrasin përsë gjalli. Më mirë të më vijë të më hapi varrin për të gjithë familjen.
Askush nuk na ka thënë që ne të mos ndërtonim në këtë zonë. Vetë Edi Rama na ka ardhur, dhe na ka thënë që të ndërtojmë sa më shumë. Na kanë mjelë si bagëtitë. Jam hallexhi, na kanë çuar në zero. Nuk ka të drejtën fëmija ime që të jetojë me dinjitet në këtë vend, le të na burgosë. Le të na varrosë ne atje, si do e nis unë nga zero në vitin 2018”, shprehet një prej banorëve.
Mes lotësh, ata lëshojnë thirrje ndaj qeverisë, e madje nuk kursejnë edhe sharjet. “Mos u ngopshin kurrë, mos u ngopshin”, shprehet një prej banoreve.
‘’Është nëna për të dalë këtu moj, po ç’të bëj janë 8 veta që qajnë me pikën e lotit në shtëpi. Pse nuk vjen këtu Edi Rama dhe të na sqarojë të gjithëve. Na nxori në rrugë të madhe”, shprehet një tjetër e moshuar që rrezikon t’i prishet banesa e saj.
