Veshja e vajzave të ekranit është kthyer vazhdimisht në vëmendje. Debate mes opinionistëve, gazetërve, tituj bombastikë në median online. Të nxitur nga “lufta” për të marr sa më shumë audiencë, duket se më shumë se tek përmbajtja, ekranet shqiptare e kanë përqendruar vëmendjen tek joshja e publikut. Duke përdorur imazhin e femrës si “objekt tërheqje”.
Edhe pse ka më shumë se 20 vite që ka rënë sistemi komunist, përsëri diferenca midis vajzave të ekranit në ato kohë, me vajzat e sotme është shumë e madhe. Nga kamishat e mbyllura në folëset që japin lajmet me dekoltenë krejtësisht të hapur. Nuk ka rëndësi nëse është një edicion informativ, emision argëtues, parashikim i motit, videoklip. Shumë prej tyre po ngatërrojnë finesën me të ekzagjeruarën. Por, si perceptohet kjo gjë nga qytetarët?
Këta të fundit të pyetur nga Tirana Today shprehen se shpesh ajo që mendohet të jetë veshje, është më tepër zhveshje.
“Janë pak si shumë ekstravagante, nuk jemi gati ne si vend për këto veshje. Para viteve ’90 nuk kërcente derri e dosa, kishte rregulla atëherë. Të internonin në Savër, të Lushnjes. Kurse tani nuk mund të rrish dot me vajzën a mbesën dhe të shohësh televizor. Sepse të vjen turp.”
“Kjo është sipas dëshirës të gjithsecilës, ato kanë qejf të dalin ashtu, le të dalin. Dhe pse shumë prej neve na duket e tepër. Por, ajo gjë varet dhe nga kultura apo familja.”
“Varet nga situata, ka nga ato që janë shumë normale. Pastaj janë dhe ato që e ekzagjerojnë fare. Më së shumti janë këto këngëtaret e çuditshme, që sapo janë futur në treg.”
“Ndihemi në siklet kur jemi me familjen”
“E ekzagjerojnë më shumë seç duhet. Si Luana, Enca, këto që njihen. Mua si mashkull normalisht që më pëlqen t’i shoh. Por, kur jemi me familjen dhe dalin ato në ekran, ndihesh në siklet.”
“Po, është e vërtetë që vajzat shqiptare sa vijnë edhe më shumë zhvishen. Ama mua të gjitha më duken shumë false.”
“Këtu zhvishen më shumë se gjithë bota. Kërkojnë vetëm të nxjerrin e tregojnë hiret e tyre. Problemi qëndron se si mosha 18 dhe 30, njësoj po vishen. Nuk ka më dallim.”
Nuk ka rëndësi nëse është mosha e tretë, minoren, familjarë, besimtar apo ateist, për qytetarët shumë herë ajo që shfaqet në ekrane nuk është sensuale, por banale. Në një kohë kur pamja është kthyer në një faktor më të rëndësishëm madje edhe se fjala, vajzat e ekranit shqiptar mund të shmangin ekzibicionizma me look-un e tyre. Sepse në fund të ditës, veshja duhet t’i përshtatet disa normave të caktuara. Për mos të vazhduar me dhënien e mesazheve të gabuara. TIRANA TODAY
