15-ditëshi i parë i nëntorit do të jetë i qëndrueshëm, me përjashtim të datës 7. Por ditë të njëpasnjëshme me diell na presin edhe në muajin nëntor. Këtë parashikim e ka dhënë meteorologia Lajda Porja, e cila ka qënë e ftuar në “Rudina”, në “Tv Klan”. Siç duket, ky vit pritet të mbyllet me temperatura të larta dhe mot të qëndrueshëm, ndërsa nëntori do të jetë një muaj me temperatura të larta.
“Muaji tetor ka pasur episode të pakta me shi, ka pasur shi një ditë në dhjetëditëshin e parë dhe ditën e djeshme. Ndërkohë, përmirësimi i motit ka filluar që sot dhe pritet që e gjithë java të jetë me mot të qëndrueshëm e të kthjellët. 15-ditëshi i parë i nëntorit do të jetë i qëndrueshëm, me përjashtim të datës 7. Por ditë të njëpasnjëshme me diell na presin edhe në muajin nëntor.”
“Normalisht për stinën në të cilën jemi, kjo nuk është normale. Sepse muaji nëntor duhet të jetë muaji më i lagësht i vitit. Ky vit parashikohet të mbyllet me temperatura më të larta se sa normalet.
I gjithë territori ka vlera më të larta sesa normalja. Kjo javë pritet të shënojë temperatura 28 gradë celsius, dhe në zona të veçanta edhe 29 gradë. Është kohë për plazh. Dhjetori parashikohet të jetë i ngrohtë, dhe të ketë më shumë ditë me diell dhe pak ditë me reshje.
Parashikohet që disi më ftohtë të jetë janari dhe shkurti, por duke qenë se është parashikim afatgjatë, ka gabueshmëri më të madhe. Por mund të them se ky vit mbyllet me temperatura të larta”, tha ajo.
