Aleanca për Mbrojtjen e Teatrit Kombëtar ka apeluar ndaj deputetëve, që të tërhiqen nga ligji për shembjen e Teatrit Kombëtar. Sipas regjisorit Edmond Budina, deputetët janë të informuar dhe po bëhen palë në vjedhje kundër interesit publik, e në shkelje të Kushtetutës. Budina citon më tej se sido që të votojnë deputetët, Teatrin nuk do ta lënë për asnjë arsye që të prishet.
“Deputetët po bëhen haptazi palë në vjedhje kundër interesit publik, dhe në shkelje të Kushtetutës. Çfarëdo që të bëni në pjesën e mbetur të jetës tuaj, kudo që të shkoni, kjo votë do t’ju ndjekë nga pas.
Do të konsideroheni si deputetët që votuan për të vjedhur popullin e tij. Jeni ju ato që do të vendosni se me çfarë reputacioni do të mbaheni mend para popullit tuaj.
Për ne votimi i sotëm është thjeshtë konfirmimi i radhës, që kemi të bëjmë një qeveri të paskrupullt. Qartazi kriminale, e cila nuk ndalet para asgjëje, me qëllim kryerjen e grabitjes së planifikuar.
Aleanca e ka shprehur qartë qëndrimin e saj, se Teatrin do ta mbrojmë deri në fund. Qoftë dhe me trupat tanë po qe e nevojshme.
Sido që të votojnë sot deputetët, Teatri nuk do të shembet. Sot janë deputetë që duhet të vendosin në cilën anë të historisë do të qendrojnë. Mos u bëni palë më vjedhjen. Mos u bëni palë me vjedhjen e Kushtetutës. Brezat që do të vijnë, nuk do t’ua falin!” , u shpreh Budina.
