Trafikimi apo edhe konsumi i lëndëve narkotike, është sot një akt i dënueshëm. Por deri vonë kanabisi dhe nën-variante të tij, janë blerë pa problem dhe përdorur rregullisht në familjet shqiptare.
Nënat e përdornin lëndën narkotike për të qetësuar dhe vënë në gjumë fëmijët, sidomos kur këta vuanin nga ndonjë sëmundje. Fëmijët ekspozoheshin në tymin e hashashit, apo pinin lëngun e dalë prej tij. Kjo ishte një traditë e trashëguar brez pas brezi, dhe gratë nuk kishin asnjë informacion mjekësor, mbi dëmet anësore të asaj bime “gjumëndjellëse”. Ndaj kishte jo pak raste kur fëmijëve u ishte dhënë aq shumë hashash, saqë ai kalonte nga gjumi në koma të thellë, dhe më pas në vdekje. Kjo dukuri ishte aq shumë e përhapur, saqë në vitin 1947, Ministria e Shëndetësisë, urdhëron ndalimin e shitjes së hashashit. “Nji ndër veset shumë të këqija në vendin t’onë, në lidhje me rritjen e foshnjave, asht dhanja e Hashashit, fuqia dejëse e të cilit përdoret për të qetësue fëmij të qajnë ose janë të çqetesuen. Shitja e tij ushtrohet lirisht në treg, veçanërisht ndër ditë pazari. Tue qenë se hashashi asht nji narkotik i fuqishëm e shumë e shumë i rrezikshëm për organizmin, porositeni të merrni gjithë masat e duhura për ndalimin e shitjes e përdorimit të tij”- thuhej në urdhrin e ministrit të kohës, Medar Shtylla.
