Njëra prej personave e akuzuar nga Drejtoria e Hetimit Tatimor për një skemë mashtrimi me vlerë dëmi 1 mln dollarë dhe që ndodhet aktualisht në arrest shtëpie është edhe Elsa Biba.
https://tiranatoday.com/goditet-nje-rast-mashtrimizbulohet-skema-mafioze-me-vlere-demi-1-milion-dollare/
Biba sipas njoftimit nga Tatimet është ortakja e vetme e firmës “ARENI ALBANIA”, por pak vite më parë asaj i kanë vrarë burrin, dhe ja kanë groposur në Dajt.
Vasil Biba që ka qenë pronar i firmës që ja la trashëgimi së shoqes, u gjet i groposur në vitin 2016. Ngjarja bëri bujë atë kohë, ndërsa viktima Vasil Biba dyshohet se u vra për mashtrime në fushën e ndërtimit. Pikërisht për një skemë mashtrimi me ndërtimet akuzohet dhe e shoqja e tij.
Pas hetimeve nga Prokuroria e Tiranës me në krye prokurorin Ndini Tavani gjykata dha masat e sigurisë për 4 persona të akuzuar nga Hetimi Tatimor për ngritjen e një skeme mashtrimi. Sot Gjykata ka vendosur masën e sigurimit arrest shtëpie për shtetasen Elsa Bibën, 32 vjeçe me detyrë administratore dhe ortake e vetme e shoqërisë “ARENI ALBANIA” sh.p.k.
VRASJA E VASIL BIBËS
Më 15 shkurt të vitit 2016 qeni i një bariu zbuloi një kufomë të groposur në fshatin Priskë të Dajtit. Pas ekzaminimeve të shenjave të gishtave nga mjekësia ligjore mbi kufomën e dekompozuar, viktima rezultoi të jetë Vasil Biba. 36-vjeçari nga Pogradeci dhe me banim në kryeqytet, ishte denoncuar i zhdukur nga bashkëshortja e tij në 16 dhjetor 2015.
Ai ishte i dënuar dy herë nga gjykata shqiptare për evazion fiskal dhe për drejtim mjeti pa patentë. Ndërkohë mbi të vazhdonin hetimet pasi dyshohet se Biba si agjent imobiliar kishte mashtruar disa njerëz duke u shitur të njëjtin apartament disa personave. Pas këqyrjes së trupit në ambientet e morgut rezultoi se personi i pajetë ishte qëlluar me armë zjarri një herë në kokë dhe një herë në zemër.
