Barcelona përjetoi dështimin e parë këtë sezon, pasi u ndal të dielën nga Girona në “Camp Nou” me rezultatin 2-2. Katalanasit duket se kishin gjithçka nën kontroll, deri në momentin që Lenglet ndëshkohet me karton të kuq që në pjesën e parë. Vendimi erdhi pas ndërhyrjes së VAR dhe për këtë ka pasur shumë kontestime në fundin e takimit. Ndërsa Messi ka qenë shumë i acaruar me arbitrat në fund të takimit saqë ka refuzuar tu japë edhe dorën.
“VAR duhet përdorur në mënyrë korrekte dhe me kritere të njëjta”, tha Busquets pas ndeshjes, ndërsa trajneri Ernesto Valverde u tregua edhe më polemizues: “Është kartoni i parë i kuq në histori ku lojtari që ka pësuar faull kërkon falje”.
Barcelona ka mbështetur futjen e teknologjisë në futboll, por tashmë është e shqetësuar për mënyrën e përdorimit të saj. Klubi katalanas kërkon zbatim të njëtrajtshëm kriteresh dhe që VAR të ndërhyjë vetëm kur është gjithçka shumë e qartë dhe nuk lë hapësirë për interpretime.
Në 5 javë kampionati Barça i ka parë të dyja anët e medaljes, sepse në javën e dytë VAR i anuloi një gol Valladolid-it në shtesë, për pozicion jashtë loje milimetrik, ndërsa tani e pëson Lenglet.
Interesante është se futbollisti i Girona-s, Pere Pons, pas ndeshjes deklaroi se nuk e kishte të qartë pse Lenglet doli me karton të kuq: “I kërkova falje, nuk është faji im dhe as Lenglet nuk ka faj. Vendos VAR, nuk e di a kishte agresion, sepse të dy shkuam në limitet e faullit”.
