Numri i të përdoruesve të drogës në Shqipëri është në rritje. Ka qenë kjo deklarata e ekspertit amerikan të Antidrogës, Eric Siervo, njëkohësisht edhe zëvendëspresident i CADCA-së. Organizatë e cila ka për qëllim parandalimin e përdorimit të drogave te të rinjtë, nëpërmjet ngritjes së grupeve të punës. Për këtë arsye, qeveria në bashkëpunim me ambasadën amerikane në Shqipëri, sollën organizatën ndërkombëtare në vend.
Teksa një prej dograve më të përhapura vazhdon të mbetet hashashi, duket se për shumë të rinj, ajo është diçka normale dhe madje duhet legalizuar. Madje janë të shumtë studentët të cilët e pinë për tu qetësuar. Ndërkohë të tjerë të rinj shprehen se Shqipëria njihet në botë për hashashin, ndaj këtë gjë duhet ta kthejmë në bonus dhe të ndihmojmë ekonominë e vendit.
“Më mirë legale, sesa ilegale, po ashtu njerëzit do të bënin lekë. E kemi provuar të gjithë dhe të jep një efekt shumë të mirë. Pasi ndjehesh high, kalon mirë me shoqërinë.”
“Nuk jemi vetëm ne, janë të shumta shtetet të cilat e kanë legale. Gati 90% e të rinjve po e pinë, edhe pse nuk është e legalizuar.”
“Ne tashmë jemi të njohur me këtë gjë, pse mos ta kthejmë në një bonus për Shqipërinë. Hashashi ka një efekt qetësues, sidomos për studentët të cilët e pinë kur janë të stresuar veçanërisht në sezonin e provimeve. Është ilaçi më i mirë që të qetëson, sepse paracetamoli apo këto të tjerat, mund të jenë akoma më fiksues se hashashi. Pasi ky i fundit është thjesht tip bari, që të relakson dhe asgjë më tepër.”
“As nuk e kam vënë në gojë, jo hashashin, por as duhanin e kafen. Janë gjërat më të keqe në botë. Ata që i pinë këto gjëra bëhen të xhindosur, vrasin njerëz.”
Por, duket se çështja e hashashit ka ndarë edhe prindërit të cilët për disa është diçka normale e për të tjerët një arsye për të mohuar fëmijët e vetë.
“Po, le të legalizohet. Nëse hashashi bëhet i ligjshëm, ka gjëra të mira. Edhe alkooli më parë nuk lejohej, ishte i paligjshëm, po ashtu duhet të ndodh dhe me hashashin. Edhe nëse fëmijët e mi, nëse e pijnë me kujdes, nuk ka asgjë për tu shqetësuar.”
“Nëse fëmija im do të pinte hashash unë nuk do ta quaja më si vajzën apo djalin tim. Pse të vuaj unë zgjedhjet e gabuara të fëmijës. Kjo varet e gjitha nga edukata që i japin në familje, nëse prindërit janë të saktë, atëherë edhe fëmijët do të jenë. Por, larg nga ata njerëz të cilët e konsumojnë.” TIRANA TODAY
