Nga: Anxhela Ferra
Sipas një raporti nga Barometri i Ballkanit, 33% e shqiptarëve i tremben varfërisë. Të rinj, të moshuar nuk kanë siguri ekonomike ne vend, duke iu frikësuar të nesërmes. Por, sipas Arbër Hajdarit, themeluesit të “Fundjavë Ndryshe”, situata është më shqetësuese.
“33% e shqiptarëve të cilët kanë frikë se do të bien në varfëri është një numër i lartë. Por, unë mendoj se është akoma më i lartë, është rreth 55%. Njerëzit janë të frikësuar sepse me të ardhurat që marrin në familje nuk janë të mjaftueshme dhe puna që bëjnë nuk është e sigurt. Sidomos në raportet ku shteti duhet të ndërhyjë sa i takon kontratave të punës midis të punësuarit dhe punëmarrësit.
Kjo i jep njerëzve një pasiguri se si do t’i planifikojnë ato pak të ardhura që kanë. I jep pasiguri për një të nesërme më të mirë. Numri i të ardhurave është shumë i vogël, pagat nuk janë shumë të larta dhe kjo i mban njerëzit të frikësuar se janë një hap larg varfërisë dhe minimumit jetik. Numri i familjeve që po kalojnë në varfëri, po rritet çdo ditë.”
Por, në Shqipëri numri i shtresës së mesme, ose atyre që ndryshe quhen ‘jakat e bardha’ sa vjen edhe ulet. Edhe pse kjo shtresë bën rregullatorin e ekonomisë. Duke krijuar një hendek të madh midis të varfëve dhe të pasurve.
1/3 e popullsisë jeton me minimum jetik, po zhduket qëllimisht shtresa e mesme
“Pushteti ekonomik në Shqipëri është fokusuar në pak duar dhe shtresa e mesme është gati në degradim. Është rreth 3% numri i njerëzve të cilët kanë para në këtë vend, janë ata të cilët kanë ekonominë, asetet, pra gjithë pushtetin ekonomik. Pjesa tjetër janë të varfrit.
Ka një përqindje shumë të vogël të shtresës së mesme në Shqipëri, e cila bën rregullatorin e ekonomisë. Dhe për këtë shtresë është duke punuar intensivisht që të shkatërrohet, nga grupime të caktuara.
Qeveritë nuk janë marr kurrë seriozisht me identifikimin dhe detajet e varfërisë në Shqipëri. Unë kam parë gjithë studimet që janë bërë dhe mendoj se ka pasur një mungesë vullneti për të pasur një numër real se sa është numri i familjeve që jetojnë në minimumin jetik.
Ne kemi nisur që në fillimet e punës tonë me një statistikë të detajuar dhe një identifikim të hollësishëm, sesa është numri i familjeve në nevojë dhe pse janë në këtë gjendje. Mendoj se është gati 1/3 e vendit që jetojnë nën minimumin jetik. Zonat më të prekura janë fshatrat e vendit tonë nga jugu në veri, por edhe Shqipëria e Mesme.
Varfëria në Shqipëri stimulohet për të kontrolluar njerëzit
Varfëria në Shqipëri është e mbartur ndër vite me radhë, por edhe është stimuluar që të rrijë në këtë gjendje. Kjo pasi është një lloj sundimi mbi njerëzit. Është një fenomen i përdorur nga bota rreth 300 vjet më parë. Bota e ka ndërruar tani dhe nuk i mban më njerëzit duke i sunduar nëpërmjet bukës. Por, ka futur sistemet e konkurrencës, i ka siguruar njerëzve një shtëpi a makinë. Kurse ne jemi akoma në ato fazat ku njerëzit janë të nënshtruar pasi kërkojnë një punë minimale për të jetuar, duke u paguar me ditë. Dhe mendoj se ky është një problem shumë i madh,”-shprehet Hajdari për Tirana Today.
Janë shqiptarët dembelë apo shteti nuk është duke punuar seriozisht për këtë kategori? Por, deri atëherë shumë prej tyre po shkojnë çdo ditë e më shumë pranë mjerimit.
Asnjë hap drejt BE-së, pa u zgjidhur varfëria
“Është një situatë e cila ka ardhur edhe pse shqiptarët e kanë lënë punën pas dore. Ka një përqindje të shqiptarëve të cilët janë dembelë. Ne e kemi hasur këtë edhe në rastet kur kemi finalizuar banesa e vazhdojmë t’i mbikëqyrim për t’i gjetur një vend pune. Por, ata kanë më shumë nevojë të nxiten e të motivohen. Kjo është ajo çka i ka humbur këtij populli dhe nëse një shoqërie i humb motivimi, atëherë presin që gjithçka të vijë nga qielli. Mirëpo, asnjëherë nuk ndodh kështu.
Mundësitë janë, edhe shteti para ka, por ai përdor rreth 1% të buxhetit të shtetit për ndihmat sociale. Por, kjo është një përqindje shumë e vogël e ndarë për këto grupime të caktuara. Mirëpo, Shqipëria nuk do të bëjë asnjë hap drejt Bashkimit Evropian, nëse nuk do të zgjidhet problemi i varfërisë.” TIRANA TODAY
