Shqiptarët i tremben varfërisë. Ky është përfundimi i dalë nga një raport i Këshillit të Evropës. 33% e të anketuarve shqiptarë kanë pohuar, që kanë frikë se mund të varfërohen në vitet e mëtejme. Krahasuar me vendet e tjera të rajonit, Shqipëria ka mesataren më të lartë, madje shumë më të lartë sesa mesatarja rajonale prej 24%.
Qytetarët thonë për Tirana Today se asnjë grupmoshë nuk ka siguri ekonomike në Shqipëri. Kjo pasi punë nuk ka aq sa duhet, si edhe kujdesi i shtetit për moshën e tretë është shumë i dobët.
Por, ka edhe nga ata qytetarë të cilët fajësojnë vetë shqiptarët, si një popull dembel.
“Duhet t’ia kërkoni vetes pse keni këtë frikë. Unë nuk banoj këtu, jetoj në Milano dhe nuk kam frikë për të ardhmen. Më vjen keq shumë për këta këtu, por shqiptarët janë fajtorë edhe vetë.”
Ata shprehen për Tirana Today se gjatë ndryshimeve të viteve ’90 patën shpresa të mëdha për të ardhmen. Por, sot gjendja nuk është në atë pritshmëri, duke e cilësuar një katrahurë.
“Sot është një katrahurë e vërtetë. Në ’90-ën ka qenë ultra, atëherë hante qeni petulla, kurse sot ta harrojmë.
Varfëria ekziston dhe ne kemi frikë për çfarë do të vijë më pas. Shkojmë i biem në qaf fëmijëve. Sigurisht, që gjërat kanë ndryshuar krahasim me vitet ’90 dhe tani ke çdo gjë. Mirëpo, shih me sy e plas me zemër!” TIRANA TODAY
