Kryeministri Edi Rama i është përgjigjur menjëherë thirrjes së ambasadorit amerikan në vendin tonë Donald Lu, i cili ka deklaruar se Qeveria ka dështuar të arrestojë Kelment Balilin, të cilësuar si “Eskobar i Ballkanit”. Këtë deklaratë Lu e bëri gjatë fjalës së tij në aktivitetin “Forca e Ligjit në Veprim: Arritje dhe sfida”, ku i pranishëm ishte edhe Kryeministri Edi Rama e ministri i Brendshëm Fatmir Xhafaj.
Kryeministri duke iu përgjigjur ambasadorit Donald Lu, theksoi se Balili, i konsideruar si “Eskobar i Ballkanit”, ka pasur lidhje politike pasi dy vite më parë ishte Drejtor i Transporteve në Sarandë.
“Unë e kuptoj shqetësimin e ambasadorit (Donald Lu) për Balilin dhe pa diskutim që kapja e këtij personazhi është domosdoshmëri dhe do të jetë sukses i madh, por të mos harrojmë se vetëm pak vite më parë ishte drejtor transporti.
Sot është në kërkim dhe patjetër që, në bashkëpunim me partnerët, ai do të kapet, edhe pse nuk është e lehtë, siç tregojnë edhe shembujt e vendeve të tjera kur bëhet fjalë për persona të kësaj natyre.
Pa diskutim që arritja në kapjen e këtij personazhi të botës së krimit është një domosdoshmëri dhe sukses i madh. Ishte dy vjet më parë, ishte drejtor i lidhur politikisht. Çuditërisht jo drejtor peshkimi, por drejtor transporti. Sot është në kërkim dhe në bashkëpunim me partnerët, ai do të kapet, edhe pse nuk është e lehtë”, tha Kryeministri Edi Rama.
Kreu i qeverisë shqiptare vlerësoi gjithashtu punën e policisë gjatë 5 viteve të fundit. Sipas tij, Policia e Shtetit ka rritur bashkëpunimin me agjencitë ligjzbatuese për të luftuar krimin e organizuar. Kryeministri bëri me dije se policët shqiptarë kanë zbritur në terrenet e shteteve të tjera për të bashkëpunuar në luftën ndaj krimit të organizuar, ku janë të përfshirë edhe shtetas shqiptarë. Duke iu drejtuar edhe ambasadorëve të vendeve të huaja të pranishëm në këtë aktivitet, Kryeministri theksoi se bashkëpunimi mes tyre do të japë rezultatet e duhura, ndërsa “hedhja e topit” për përgjegjësitë nuk çon askund.
“Policia e Shtetit e ka garantuar që paprekshmëria e individit në Shqipëri nuk ekziston më. Çështja është që sistemi i drejtësisë të garantojë që paprekshmëria nuk ekziston më. Nuk ka më grupe që në trafiqet e drogërave veprojnë të lokalizuara. Janë të ndërkombëtarizuara. Janë grupe që kanë zanafillën diku dhe e kanë fundin diku tjetër. Është e domosdoshme që u nënvizua nga disa prej ambasadorëve, bashkëpunimi ndërkombëtar, ku tani më Policia e Shtetit është në terren në vende të tjera dhe do të shkojë edhe në të tjera. Sapo është firmosur marrëveshje me qeverinë holandeze. Hedhja e topit te njëri-tjetri nuk na çon larg. Unë e kam refuzuar dhe refuzoj kategorikisht përshkrimin e Shqipërisë që ka specifikë të veçantë për krimin e organizuar”, u shpreh Kryeministri Edi Rama.
Më tej në fjalën e tij kryeministri Edi Rama është shprehur se mbi 100 raste kriminelësh janë liruar 4 vite më parë, dhe për këtë qeveria e atëhershme duhet të jetë përgjegjëse. Ndërsa më tej Rama u shpreh se me sistemin e ri të drejtësisë paprekshmëria nuk do të ekzistojë më.
“Nëse flasim për prekshmërinë nuk ka qenë shumë e shumë vite më parë. Por ka qenë 4 vite më parë kohë kur qytetarët ndaheshin në të prekshëm dhe të paprekshëm. Ka qenë katër vite më parë koha ku ministrat mund të parkonin në çdo trotuar dhe mund të bllokoni çdo trotuar. Ligji nuk zbatohej njëlloj më parë. Vetëm 4 vite më parë ka qenë kohë kur raporti me ligjin kalonte përmes përkatësisë politike.
Katër vite më parë komunikatat e policisë së shtetit ishin sekret. Të gjitha këto i përkasin të shkuarës. Këta nuk janë pak për të parë të nesërmen përmes kësaj retrospektive”, -tha Rama.
