Kryetari i Partisë Demokratike Lulzim Basha doli zbuluar me deklaratat e tij për negociatat duke iu referuar verdiktit të gjermanëve. Të enjten gjatë seancës plenare në Kuvend, kryedemokrati deklaroi se qeveria gjermane, përmes një rezolute ka deklaruar se Rama nuk i ka bërë detyrat. Basha tha me bindje se kristian demokratët dhe kristian-socialistët gjermane dhe partia simotër e PS-së, kanë vendosur për mos hapjen e negociatave për Shqipërinë.
Lexo edhe: Integrimi na “ngel në klasë”, s’kemi bërë detyrat. Gjermanët na vendosin kushte
“Ashtu si Rama e di fare mirë, lajmi nga ky rekomandim është më i keqi që shqiptarët mund të prisnin, është një lajm që Shqipëria nuk e meriton, por është verdikti gjerman tashmë jo thjeshtë i Gunther Krichbaum vetëm, Johann Wadephul, por i mazhorancës gjermane, konservarorë dhe socialistë së bashku se Edi Rama ka gënjyer, se Rama nuk i ka bërë detyrat. Se Shqipëria nuk i ka plotësuar kushtet për hapjen e negociatave. Në këtë rezolutë e cila do të bëhet zyrtare javën e ardhshme, të martën, për herë të parë Shqipërisë nuk i vendosen thjeshtë kushte, por edhe një proces kontrolli që demostron pabesueshmërinë ndaj çdo lloj raportimi nga Edi Rama, apo hallka institucionale të blera e të korruptuara nga ai. Kjo është një ngjarje dramatike për Shqipërinë”, tha Basha të enjten në Kuvend.
Ndërkohë sot, anëtari i grupit parlamentar CDU/CSU në Bundestag, Johann Wadepfuhl, të cilit Basha i përmendi emrin se ishte në grupin e deputetëve gjermanë të cilët kërkonin mos hapjen e negociatave për Shqipërinë, deklaron se ai gjithmonë ka mbështetur dhe mbështet hapjen e negociatave për Shqipërinë.
Në një intervistë për “DW” Wadepfuhl deklaron se CDU i thotë “po” Shqipërisë për negociatat.
“E rëndësishme për ne është që të themi Po, por edhe…Pra po, duhet të fillohet me bisedimet për negociatat,” thekson deputeti gjerman.
Lexo edhe: Wadephul: CDU i thotë Po Shqipërisë për negociatat
Gjithashtu, Wadepfuhl theksoi se “gjermanët kanë nevojë për një orientim më të qartë ndaj vlerave europiane në disa fusha, marrëveshja e koalicionit e thotë qartë, se kriteret duhet të plotësohen edhe në fillimin e negociatave, jo vetëm në anëtarësim. Kjo nënkupton një luftë më të ashpër kundër korrupsionit se deri më tani, se reforma në drejtësi duhet të vazhdohet më me vendosmëri se deri më tani, se duhet të ketë një reformë zgjedhore që kërkohet prej kohësh si nga KE por edhe nga OSBE. Këto janë tri fusha ku ne themi se Komisioni që zhvillon bisedime i ngarkuar nga BE duhet t’i shohë me vëmendje.” TIRANA TODAY
