Ndalimi dhe marrja në pyetje për disa orë i një 63-vjeçari italian nuk ka dhënë rezultatet e shpresuara nga hetuesit italianë në provincën e Cuneo.
Ai dyshohet se ishte klienti i fundit i Anxhela Meçanit, prostitutës së re shqiptare të vrarë të shtunën.
Mediat italiane shkruajnë se i është sekuestruar edhe makina e italianit të arrestuar, me banim në një provincë të Cuneos. Dyshohet se klienti e ka vrarë Anxhelën pasi nuk donte të paguante paratë pas shërbimit.
Pasi Anxhela i kërkonte me ngulm paratë, ai e ka shtyrë atë jashtë.
Mediat fqinje nuk japin ende një emër për personin e arrestuar, megjithatë mësohet se policia ka sekuestruar edhe automjetin e tij, nga ku 20-vjeçarja dyshohet se mund të jetë hedhur.
Dyshimet paraprake janë se mes Meçanit dhe klientit të saj mund të ketë pasur një konflikt për çështjen e pagesës, por pas marrjes në pyetje nuk u zbardh anjë detaj nga vrasja e së resë nga Fieri, e cila jetonte prej disa vitesh në Itali.
Si fillim mediat italiane shkruan se Anxhela Meçani u dhunua barbarisht përpara se të hidhej nga një automjet në ecje. Ajo u gjet nga një udhëtar i rastit dhe u dërgua në gjendje kritike në spital, ku dhe ndërroi jetë.
Ndryshe nga sa u dyshua dhe raportua në fillim, se 20-vjeçarja shqiptare u dhunua barbarisht dhe më pas u hodh në rrugë nga një makinë në ecje, rezultatet e autopsisë i kanë hedhur poshtë të dyja këto versione.
Sipas mjekut ligjor, e reja është përplasur nga një automjet, që më pas është larguar me shpejtësi nga vendi i ngjarjes. Kjo shpjegon edhe frakturat e shumta të gjetura në trupin e së resë, që duket se janë bërë nga impakti i përplasjes, e jo nga dhuna dhe hedhja në rrugë.
Kur u transportua për në spital, Anxhela mësohet se u foli mjekëve për një klient, që ndoshta nuk e kishte paguar dhe i tha se kishte rënë nga një automjet.
“Ai burri nuk më pagoi, pastaj rashë”, mësohet të ketë artikuluar e reja.
Kjo dhe rezultatet e autopsisë ngrenë hipotezën se klienti i së resë nuk ka pranuar ta paguajë dhe e ka zbritur atë nga makina. Më pas është nisur me shpejtësi duke e marrë përpara, e duke e lënë për të vdekur në rrugë. Ishte një udhëtar i rastit që e gjeti të renë, e cila vdiq më pas në spital.
Falë tabulateve telefonike dhe pamjeve të kapura nga kamerat e sigurisë në rrugë, hetuesit mbërritën tek 63-vjeçari në Fossano.
Megjithatë, të paktën për momentin duket se nuk ka ende prova që ta bëjnë këtë të fundit përgjegjësin kryesor të vrasjes së shqiptares, e cila kishte shkuar në Itali me ëndrrën për t’u bërë balerinë dhe përfundoi duke u prostituuar në rrugët e periferisë.
