Deputeti i “Agimit të Artë” në Greqi ka shpërthyer me tone të ashpra ndaj shqiptarëve që kanë arritur të krijojnë një karrierë të suksesshme në tokën helene. Diskutimet për një memorandum të marrëdhënieve Shqipëri-Greqi në parlamentin grek, për anëtarësimin e Shqipërisë në BE, ka kthyer përsëri në epiqendrën e politikanëve grekë emrin e Ergys Kaçes.
“Ju i shihni kush janë shqiptarët, e shihni në rastin e festivalit në ‘Eurovision’ ku u reklamua një këngëtare(Eleni Foureira) që tha se nuk ishte shqiptare. Tha se ishte nga Guatemala, Nikaragua… dhe të gjithë ata… disa futbollistë a këngëtarë të dështuar shqiptarë, fitojnë para në Greqi, pasi këtu ka shumë budallenj. Ata pastaj fillojnë të veshin fanella të UÇK, fanella të Shqipërisë. Kushdo që beson te ata, reklamon Shqipërinë e Madhe jashtë Greqisë. Le të shkojnë aty ku ishin askushi e nuk kishin këpucë në këmbë.
Asnjë bisedë për shqiptarët, asnjë negociatë, derisa të ndalojë politika antigreke e qeverisë shqiptare. Veto greke kërkon Agimi i Artë për të mos vijuar asnjë diskutim me sistemin Rama per integrim në BE”,- përfundoi delirin racist deputeti i Agimit të Artë sot në parlamentin grek.
Ai i referohej pikërisht fotos së famshme të Kaçes me fanellën e UÇK të disa viteve më parë. Edhe atëherë, “Agimi i Artë” kërkoi ndëshkimin apo përjashtimin e mesfushorit shqiptar nga Greqia.
