Brion Skrapari është 25-vjeçari i cili ndërroi jetë mëngjesin e sotëm në Spitalin e Traumës në kryeqytet, pasi u hodh nga kati i tretë i banesës. Mbrëmjen e së shtunës, i riu ishte konfliktuar me prindërit dhe më pas i kishte qëlluar me thikë. Babai E.Skrapari 60 vjeç dhe e ëma A.Skrapari 54 vjeç mbetën të plagosur dhe ndodhen në spital jashtë rrezikut për jetën.
Sipas hetimeve paraprake të policisë, Brion Skrapari vuante nga probleme të shëndetit mendor dhe mjekohej prej disa kohësh. Pasi goditi prindërit me thikë, ai u hodh nga kati i tretë i banesës në rrugën “Nasi Pablo”. Fillimisht mbeti i plagosur dhe u dërgua në spital me plagë të rënda në kokë dhe në trup. 25-vjeçari ndërroi jetë në spital pas disa orësh, ndërsa policia vazhdon hetimet për këtë ngjarje.
Report Tv mëson se ka dyshime që 25-vjeçari të ishte pjesë e rrymave ekstremiste, dhe pikërisht kjo ka qenë arsyeja e sherrit me prindërit, që ka përfunduar me vdekjen e të riut dhe plagosjen e prindërve të tij.
Nga kontrolli në kompjuterin e 25-vjeçarit Brion Skrapari janë gjetur materiale me propagandë islamike, por përfshirja e tij në këto rryma ekstremiste nuk pranohej nga prindërit, të cilët janë konfliktuar shpesh me të birin.
Pas sherrit të mbrëmjes së kaluar, djali ka qëlluar disa herë me thikë prindërit dhe është hedhur me kokë nga ballkoni, ku siç shihet dhe nga fotoja vendi është mbuluar me gjak.
Familja kishte vetëm 10 ditë që jetonte me qera në pallatin te rruga “Nasi Pablo’, ku ndodhi dhe krimi i rëndë.
