Java e 30 e Kategorisë Superiore do të ketë një mbyllje spektakolare, me superpërballjen Partizani-Skënderbeu. Korçarët janë në kushte mjaft komode në renditje, por një përballje e tillë gjithmonë ka prodhuar spektakël dhe jepet më shumë se 100% nga lojtarët. Një ndeshje që luhet prestigji i Skënderbeut dhe fati i sezonit të Partizanit, pasi të kuqtë kërkojnë me çdo kusht një fitore për të qëndruar në garë për Europën.
Sfida premton emocione, gola dhe spektakël në shkallët e stadiumit nga të dyja tifozeritë që kanë një rivalitet të ashpër mes tyre. Të kuqtë e Dalipit do të përpiqen që të shtyjnë festën e djemve të Ilir Dajës, të cilët në rast fitoreje do të siguronin matematikisht kampionatin. Objektivi i Partizanit është i qartë për këtë kampionat, zona europiane, për të cilën për momentin ka mbetur vetëm vendi i tretë në lojë, pasi Kukësi në vendin e dytë është shkëputur ndjeshëm.
Kjo është përballja e fundit dhe e katërta e këtij sezoni mes Partizanit dhe Skënderbeut, ku në tre të parat kanë festuar korçarët. Fakt është se Partizani në të tria këto ndeshje nuk ka arritur ti shënojë asnjë gol Skënderbeut, të cilat kanë përfunduar dy me fitoren e Skënderbeut dhe një në barazim pa gola. Për këtë arsye, Klevis Dalipi do të përpiqet të luajë të gjitha kartat me ndeshjen e sotme, nëse do që të jenë ende në garë për zonën europiane.
Nga ana tjetër, trajneri i skuadrës korçare, Ilir Daja është përpjekur të improvizojë me formacionin e sotëm për shkak të mungesave të tre lojtarëve kryesorë si Shehi, Soue dhe Xhejms. Reparti i avancuar i Skënderbeut do të udhëhiqet me shumë mundësi nga Emiliano Vila, i mbështetur nga Muzaka dhe Gavazaj. Ndeshja do të zhvillohet në “Selman Stërmasi” në orën 19:00.
