Mazhoranca duket se nuk e mendjen tek akuzat dhe protestat e opozitës, më shumë se sa tek raporti i Komisionit Europian për Shqipërinë, që pritet të publikohet më 17 Prill.
Është Ministri i Jashtëm Ditmir Bushati, i cili nga Shkodra është shprehur optimist, duke thënë se pret që KE të konfirmojë reformat e bëra nga qeveria në Shqipëri.
Dhe për rrjedhojë të hapen negociatat për anëtarësim.
“Kemi një ndryshim qëndrimi me opozitën por nuk është hera e parë. Shpresoj t’i rikthehen rrugës së arsyes. 17 prilli është një moment i rëndësishëm jo për qeverinë Edi Rama, jo për opozitën por është një moment i rëndësishëm për Shqipërinë. Ne mendojmë se Komisioni Europian të propozojë nisjen e bisedimeve për antarësim në BE çka do të ishte një sukses për Shqipërinë dhe shqiptarët” tha Bushati.
I pyetur nëse situata aktuale mund të ndikojë në një përgjigje negative nga Brukseli, Bushati shkon edhe më tej duke thënë se veç çeljes së negociatave pret që të nisë puna për anëtarësimin e plotë në BE.
“Ne presim që Komisioni Europian në 17 prill të konfirmojë pikërisht reformat që janë bërë në Shqipëri dhe të propozojë nisjen e bisedimeve dhe më pas do të jetë një punë tjetër voluminoze me vendet antare të BE, siç dihet nevojitet konsensus i plotë në mënyrë që të nisë procesi i vështirë, sfidues për antarësim që nuk do të jetë aspak një proces i lehtë. Është shumë e vështirë të ecet me ‘nëse’ sepse ne po punojmë për këto që thashë”- tha ai.
Deklaratat ministri Bushati i bëri pas një mbledhje në partinë socialiste të Shkodrës si koordinator politik i këtij qarku.
