Kryeministri Edi Rama ka qenë ditën e sotme në Vlorë, ku merrte pjesë në një në prezantimin e projekteve të strategjisë së re të punësimit në Vlorë.
Në këtë takim Edi Rama ka folur me qytetarët për eksperiencat e tij personale me ata që duan të punësohen.
“Bëmë pasditen e djeshme mbledhjes e Asamblesë së PS në Vlorë. Çohet një kryetar organizate dhe kërkon punë në shtet për anëtarët e organizatës. I thashë sa ke pa punë? Më dha një shifër vlonjatshe, 60 vetë. Unë i them të 60 anëtarët e organizatës nëse janë të papunë unë do rri këtu dhe nuk iki në Tiranë pa t’i futur në punë, ama në privat. Në privat, jo tha. Për shumë njerëz tanët, partia nuk mund t’i lërë në dorë të privatit. Epo në shtet nuk ka. Në shtet hyjnë në punë njerëz për të bërë detyrat e shtetit. Shteti nuk është zyrë punësimi, që kush është pa punë të hyjë në punë”, tha Rama.
Kryeministri ka vijuar me kërkesën e një tjetër socialisti. “Dua të ma bësh gruan pastruese. Dakord, në privat i them. A, jo në shtet. Sepse fshesën e shtetit mund ta lësh në cep e të pish kafe, fshesën e privatit duhet ta tundësh. Kjo është ideja”, u shpreh kreu i qeverisë.
Rama vijoi me një tjetër prind nga Kukësi, që sipas tij kishte marrë 4 oferta për punë dhe i kishte refuzuar.
“Një prind, edhe ky me shumë karrierë heroike në PS, më çon mesazh nga Kukësi, po vdes për bukë unë dhe familja ime. I them që nesër në punë. Nëse pranon punë dhe unë mund të ndihmoj, vetëm në privat. Ç’është kjo unë pranoj punë, pranoj çdo punë, unë po vdes me gjithë familjen time, thotë. Ia çoj mesazhin ministres dhe dje më vjen mesazhi i drejtorit të zyrës së punës, katër oferta për punë zotërisë për vete dhe për djalin. Sa shikon ofertën për punë, që ishte punë-punë, tha unë nuk kam nevojë po të paktën më fusni djalin. Djali me shkollim 8 klasë. Banakier, lavazhier, kamerier, ngarkim-shkarkim. Përgjigjja nuk e kam djalin për t’i shërbyer të tjerëve se e kam plot me 8 klasë”, tha Rama.
