Ish-prokurori i Përgjithshëm Adriatik Llalla u zhvendos bashkë me familjen e tij në Gjermani duke kërkuar strehim në këtë shtet. Largimi i Llallës drejt Gjermanisë vjen pasi u njoh me vendimin e Departamentit Amerikan të Shtetit ku i ndalohej përjetësisht hyrja në SHBA.
Ambasadës gjermane në Tiranë, gazeta Tema i adresoi një kërkesë për informacion për të mësuar mbi vendimin e “Berlinit zyrtar” për të strehuar një person të akuzuar për korrupsion ose shkelje të mëdha të të drejtave të njeriut, referuar vendimit të firmosur nga sekretari i shtetit amerikan Rex Tillerson.
Trupi diplomatik i akredituar në Tiranë në përgjigjen e përcjellë nënvizon se ky qëndrim është i përkohshëm dhe se Llalla mund të qëndrojë më shumë vetëm nëse përmbush ato që përcakton ligji gjerman për qëndrimin e të huajve.
“Për arsye të mbrojtjes së informacioneve personale Ambasada nuk pozicionohet lidhur me raste të veçanta.
Përgjithësisht ne sjellim në vëmendje, se cdo qytetar shqiptar në parim është i lirë të udhëtojë pa vizë për qëndrime afatshkurtra drejt Gjermanisë.
E drejta për të qëndruar në Gjermani bazohet në përcaktimet e ligjit gjerman për qëndrimin e të huajve,” shkruhet në përgjigjen e ambasadës gjermane.
Ndërkohë, më herët Adriatik Llalla përmes një shkrese të drejtuar Komisionit të Pavarur të Kualifikimit (KPK) ka, kërkuar për të mos qenë jetë subjekt i ligjit për vettingun.
Ai kreu detyrën e prokurorit të Përgjithshëm nga viti 2012 deri në dhjetor 2017, kur u zëvendësua nga Arta Marku që ndodhet përkohësisht në këtë pozicion deri në formimin e organeve të drejtësisë.
