Diskutimet mes Shqipërisë dhe Greqisë kanë shkaktuar “kaos” mes institucioneve dhe politikës shqiptare. Historiani dhe ish-ministri i Jashtëm, Paskal Milo, ka komentuar ngërçin institucional mes qeverisë dhe presidencës lidhur me plotfuqinë për nisjen e negociatave zyrtare me Greqinë.
Presidenti Meta deklaroi sot se kërkon që të përmbushen disa kritere nga qeveria, pasi sipas tij, duhet të behët i qartë objekti i plotfuqishmërisë së kërkuar nga ministri Bushati.
Njohësi i mirë i diplomacisë shqiptare, Paskal Milo, i ftuar në Report Tv ka deklaruar që Rama duhet të shkojë tek Meta dhe si dy njerëz me plotfuqishmëri politike të shmangin keqkuptimet dhe keqinterpretimet e lindura.
Ai shpreh bindjen se një komunikim direkt mes Ramës dhe Metës do të zgjidhte situatën e krijuar, ndërsa theksoi se plotfuqishmëria e presidentit duhet të jepet para çdo negociimi për marrëveshjet ndërkombëtare.
“Duhet burrëri, Edi Rama duhet të takohet me Ilir Metën. Rama dhe Meta takoheshin për gjëra që nuk kishin këtë peshë çdo të mërkurë kur ishin aleatë politikë, e jo më për çështje si marrëveshjet me Greqinë. Do të shmangnin keqkuptimet, keqinterpretimet. Komunikimi i drejtpërdrejtë i dy njerëzve të pushtetshëm, të fuqishëm në Shqipëri, mund të shmangë keqkuptimet. Mendoj se një komunikim i tyre direkt do ta zgjidhte” – u shpreh Milo .
Intervista e Milos
Si zgjidhet ky ngërç politik?
Më shqetëson atmosfera, që nuk ka arsye pse të ndodhë, duke qenë se të dy institucionet duket se kërkojnë një protagonizmi politik që deri diku edhe mund të jetë i pranueshëm. Por Meta në pozitat e kreut të shtetit, nuk besoj së kërkon edhe aq protagonizëm, por respektim të institucionit, duke iu referuar Kushtetutës dhe Gjykatës Kushtetuese por rolin që ka
A mundet që institucionet t’i drejtohen Gjykatës Kushtetuese nëse nuk gjejnë zgjidhje?
Është e tepërt, që dy institucione të shtetit t’i drejtohen Gjykatës Kushtetuese. Me pak fjalë, unë këmbëngul që në raste të tilla është shumë e nevojshme, që kryeministri dhe ministri i Jashtëm të shkojnë te Presidenti. Të ulen si zotërinj, si partnerë dhe ta zgjidhin problemin.
Mund të kërkohet ndihmë nga SHBA dhe BE?
Nuk do të ishte dinjitoze, s’mund të drejtohemi për çdo gjë te arbitrat ndërkombëtarë, të cilët kanë ndërhyrë në shumë raste për pajtimin e politikanëve shqiptarë.
