Messi e zhvlerësoi, Neymar i përgjigjet me elozhe për Ronaldon

Neymar është njeriu i momentit në futboll, spekulime ka çdo ditë për fatin e tij në merkaton e verës edhe pse ai i mohon këto zëra sa herë i jepet mundësia. Ylli brazilian po shënon rregullisht dhe ka dhuruar spektakël sa herë ka prekur në fushë. Një deklaratë ngacmuese ka ardhur pak ditë më parë në drejtim nga ish-shoku i skuadrës tek Barcelona, Lionel Messi. Ky i fundit u shpreh se pa Neymar, katalanasit janë më të konsoliduar dhe më të mirë në atë që japin në fushë. Por Neymar në një intervistë të dhënë së fundmi është shprehur se ai ka një vlerësim të veçantë për Cristiano Ronaldon, me të cilin do të përballet pak ditë më vonë, pasi portugezi ka rreth 10 vite që qëndron në majën e futbollit.

Në fakt, zërat për kalimin e tij te Real Madridi vijnë nga Spanja… Vetë Neymar nuk kompleksohet nga kjo gjë: “Kam folur edhe për këtë, gjithmonë do të ketë spekulime. Gjëja më e rëndësishme për ne është të shkojmë drejt objektivave. Objektivi i parë është të fitojmë Ligue 1, Kupën dhe Ligën e Kampionëve. Kjo e fundit është gjëja më e rëndësishme për ne. Çmimet individuale do të vijnë më vonë”.

Më 14 shkurt, Neymar do të përballet me Cristiano Ronaldon sërish, tashmë jo si pjesë e Barcelonës. Çfarë mund të na thotë sulmuesi brazilian për portugezin dhe Real Madridin si ekip? “Unë e respektoj shumë Cristianon për historinë që ka bërë. Është pasqyra, në të cilën unë shoh veten. Ka 10 vjet në krye të futbollit botëror, si Messi. Të gjithë duam të bëhemi si ata të dy. Real Madridi nuk është vetëm Cristiano Ronaldo. Ka shumë lojtarë të mëdhenj atje”.