Policia e Shkodrës ka shpallur në kërkim një person të dyshuar si autor të vrasjes mafioze që ndodhi dje, kur u gjet i vrarë në automjetin e tij Angjelin Shkami.
Ky i fundit u ekzekutua paraditen e djeshme në rrugën që të çon tek varrezat e “Stom Golemit”. Policia ka shpallur në kërkim Artan Koçekun, i cili dyshohet se është autor i ngjarjes. Koçeku kishte dalë me leje nga burgu i Fushë-Krujës, ku vuante dënimin për vjedhje.
Dyshohet se shkak për vrasjen është bërë një borxh i pashlyer.
32-vjeçari u gjet i pajetë brenda mjetit tip “Benz” me targa AA 275 BF, i cili ishte qëlluar me dy plumba në kokë dhe një në kraharor. Ngjarja ka ndodhur rreth orës 11:00, kur policia është njoftuar nga kalimtarët e rastit për praninë e një personi pa shenja jete në automjet.
Autori i kësaj ngjarje, sipas Policisë së Shkodrës, e ka qëlluar me pistoletë nga një distancë e afërt duke e lënë të vdekur në vend. Nga rindërtimi i ngjarjes, grupi hetimor thotë se, Shkami kishte ndalur makinën e tij në hyrje të varrezave të Stom Golemit dhe aty ka nisur të bisedojë me autorin e ngjarjes.
