Ish-ministri i Brendshëm, Saimir Tahiri ka mbërritur para pak minutash në Gjykatën e Krimeve të Rënda.
Ashtu siç pritej, Tahiri mbërriti në gjykatë pak para orës 09:30 i shoqëruar me avokatin e tij Maks Haxhia. Deputeti është parë duke buzëqeshur, teksa iu drejtua Gjykatës, pasi është thirrur për t’u pyetur te Krimet e Rënda nga gjyqtarja Liljana Baku për t’u njohur më masën shtrënguese që ka marrë gjykata ndaj tij, siç është ajo e bllokimit të pasaportës dhe ndalimi për t’u larguar jashtë Shqipërisë.
Thirrja e Tahirit është bërë në bazë të procedurës së kodit penal, ku personi ndaj të cilit është marra masa, thirret brenda 5 ditësh për t’ia komunikuar atë.
Ish-ministri pritet të dëshmojë për përgjimet e autoriteteve italiane, pasi emri i tij rezulton në dosjen ‘Habilaj’, të cilët akuzohen për trafik droge.
Në vendimin e Gjykatës së Krimeve të Rënda, që i bllokoi pasaportën Saimir Tahirit, pjesë e argumenteve janë edhe disa përgjime të reja, që janë paraqitur si provë nga Prokuroria.
