Presidenti turk Recep Tayyip Erdogan ka mbërritut në Athinë në orën 10:30 për një vizitë zyrtare, i ftuar nga homologu i tij grek Prokopis Pavlopoulos, të cilin e takoi, pasi vendosi një kurorë me lule në monumentin e “Ushtarit të panjohur” para Parlamentit grek.
Më pas, rreth orës 13:30 ai pritet të takohet me kryeministrin Tsipras, me të cilin do të mbajnë edhe një konferencë të përbashkët shtypi pak para orës 15. “Kjo vizitë është një mundësi për të bërë hapa përpara në miqësinë midis dy vendeve”, ka deklaruar kryeministri Tsipras.
Ndërsa në një intervistë për televizionin privat “SKAI”, Erdogan ka thënë se marrëdhëniet e këqija midis dy vendeve i përkasin së shkuarës, por ka kërkuar një rishikim të Traktatit të Lozanës, duke parashtruar përsëri kërkesën për deportimin e 8 ish-ushtarakëve turq, që u arratisën pas grushtit të dështuar shtetit, për në Greqi.
E menjëhershme ka qenë përgjigjja e Athinës zyrtare, në të cilën theksohet se, Traktati i Lozanës është guri themeltar dhe i panegociueshëm, mbi të cilin mund të ndërtohet bashkëpunimi i sinqertë i të dyja vendeve. “Raportet mbi rishikimin e tij nuk kontribuojnë në klimën që përpiqemi të ndërtojmë në rajon”.
