I vetmi sulmues i mirëfilltë që kishte tekniku Daja në dispozicion, nuk ka mundur të udhëtojë me ekipin e Skënderbeut drejt Zvicrës. Sulmuesi nigerian, James Adeniy po has probleme për pajisjen me vizë dhe për këtë arsye ka mbetur në Tiranë dhe nuk është nisur me pjesën tjetër të grupit drejt Bernës, ku këtë të enjte në orën 19:00 skuadra korçare do të luajë ndeshjen e fundit në grupet e Europa League për këtë sezon.
Drejtuesit e klubit korçar janë duke bërë të pamundurën që James të pajiset sa më shpejt me vizë, por gjithsesi edhe në rastin më të mirë 24-vjeçari, për shkak të programit të linjave ajrore nuk mund të bashkohet me pjesën tjetër të grupit para mëngjesit të së enjtes. Megjithatë te Skënderbeu shpresojnë që të arrijnë të pajisin futbollistin nigerian me vizë, ndërkohë që trajnerit Ilir Daja nuk i mbetet tjetër veçse të mbajë pezull formacionin, në pritje për të mësuar nëse do ta ketë apo jo në dispozicion James.
Tani, Skënderbeu nuk llogarit asnjë sulmues të mirëfilltë, dhe Dajës i shtohen dhimbjet e kokës, edhe pas mungesës së Soue.
