Sot mbushet 1 vit që Donald Trump u zgjodh president i Shteteve të Bashkuara të Amerikës.
Ai bëri disa premtime gjatë fushatës elektorale, të cilat bënë që shumica e shtetasve amerikanë t’i besojnë atë mandatin e presidentit.
Disa nga premtimet më të bujshme të Trump ishin vendosja e një muri në kufi me Meksikën dhe eliminimi i reformës së kujdesit shëndetësor të presidentit paraardhës, e njohur si Obama Care.
Sot, një vit pas ardhjes së Trump në krye të SHBA-ve, mijëra amerikane pritet të dalin në protesta për të shprehur pakënaqësinë me punën e deritanishme të presidentit amerikan.
Trump rezulton presidenti më pak popullor në 70 vite sipas një sondazhi të Washington Post dhe të kanalit televiziv Abc News.
Kështu, më pak se 4 në 10 amerikanë e mbështesin dhe janë të kënaqur me punën e Trump, ndërsa 60% thonë se nuk e miratojnë atë.
Por, ka persona që popullaritetin e ulët të Trump ia atribuojnë medias, për shkak të raportimit kryesisht negativ.
Kështu deklaron zëdhënësja Hackubee Sanders, e përmendi një studim të pavarur që tregon se mbulimi i Presidentit në disa rrjete televizive është 93 për qind negativ, krahasuar me 40 për qind gjatë vitit të parë të presidencës së Barack Obamës.
Të ballafaquar me këtë armiqësi të perceptuar, Presidenti Trump ka rishkruar rregullat për komunikimet presidenciale, duke u fokusuar në komunikimin nëpërmjet Twitter-it:
“Trump përdor Twitter-in për të anashkaluar shtypin në mënyra që përcjellin një mospërfillje të plotë për rolin e gazetarisë në shoqëritë demokratike”, thotë profesori i komunikimit në Universitetin e Stanford-it, Theodore Glasser.
Studiuesi presidencial Mahaffee thotë se Trump e kuptoi në fillim se si mund të shfrytëzonte përçarjet partiake dhe mosbesimin e publikut ndaj mediave.
“Mediat sociale lejojnë që gjuha më e ashpër dhe sensacionalizmi të triumfojnë mbi faktin dhe arsyen,” tha Mahaffee për Zërin e Amerikës. “Presidenti Trump përdori këto përçarje për qëllimet e tij për t’u zgjedhur, dhe qasja e tij ka qenë thellimi i mëtejshëm i përçarjeve për qëllimet e tij për të qeverisur.”
Sipas akademikëve, arritjet e Trump përgjithësisht mungojnë, teksa theksohet se republikanët kanë dështuar në përmbushjen e premtimit për reformimin e kujdesit shëndetësor dhe sistemit të taksave pavarësisht se ata kontrollojnë të dyja dhomat e Kongresit.
Megjithatë, lufta ndaj ekstremizmit islamik dhe udhëtimi i Trump në Lindjen e Mesme konsiderohen arritje të mëdha të presidentit amerikan.
“Ai ka bërë një punë shumë të mirë në ndërtimin e marrëdhënieve me shumë partnerë dhe aleatë kryesorë, veçanërisht Kryeministrin japonez Abe dhe Presidentin kinez Xi të cilët po ndihmojnë në rritjen e presionit ndaj Koresë së Veriut.
Në Arabinë Saudite, fjalimi që ai mbajti para, besoj se ishin 68 vende me shumicë myslimane, duke sjellë shumë prej këtyre individëve bashkë për të punuar në luftimin e terrorizmit; ky ishte një moment historik”, u shpreh zëdhënësja Huckabee Sanders.
