Në Kuvendin e Kosovës po zhvillohet seanca e jashtëzakonshme, ku pikë e rendit të ditës është debati parlamentar lidhur me parimet programore të Qeverisë së Kosovës.
Deputeti i Vetëvendosjes, Glauk Konjufca tha se kjo seancë është dashur të mbahej atëherë kur është thirrur, pikërisht përpara tri javëve, ndërsa akuzoi se Haradinajt nuk i pëlqen llogaridhënia dhe përgjegjësia, por vetëm kompetenca.
“Njeriu që argumentin e vetëm pse duhet të bëhet Kryeministër i Kosovës e ka shpejtësinë dhe dinamikën, del para Opozitës në kuvend me tri javë vonesë. Kur Kryeministri një ditë të tij e konsideron tri javë për demokracinë. Haradinaj doli atë ditë që duhej të vinte në sallë, në hollin e kuvendit ju tha gazetarëve me arrogancë që nuk merr pjesë në një seancë ku janë vetëm 31 deputetë në një sallë. Ai harroi që vetëm pak muaj më parë ishte pjesë e kësaj Opozite.
Por, kryeministrit tonë nuk i pëlqen fort llogaridhënia dhe përgjegjësia, por vetëm kompetenca, e këto tria shkojnë bashkë, s’mundesh me i nda. Kjo qeveri është e ndërtuar mbi pazare të nivelit më të ulët”, tha Konjufca.
Edhe deputeti i LDK, Avdullah Hoti, ka hedhur kritika në drejtim të kryeministrit Haradinaj sa i përket qëndrimit të tij në lidhje me çëshjten e Demarkacionit të Kosovës me Malin e Zi:
“Është për keqardhje se si është adresuar për media kryeministri për Demarkacionin. LDK si gjithmonë ka me qenë opozitë konsoltive, por nuk do të lejojmë që institucionet dhe shoqëria kosovare të degradojë nga kjo qeverisje”.
