Policia Italiane arrin të arrestojë një nga dy shqiptarët që u arratisën nga burgu italian të dielën.
Në pranga ka përfunduar Lekë Luca, i cili u arratis bashkë me shqiptarin tjetër Osvaldi Marku.
NĽ mediet italiane shkruhet se Luca, 42 vjeç është arrestuar jo shumë larg burgut në Civitavecchia. Policia është ende në kërkim të personit tjetër të arratisur.
Të dy shqiptarët janë dënuar për vjedhje, plaçkitje dhe prostitucion. Arratisja shkaktoi shumë polemika mbi sigurinë dhe mbipopullimi në burgjet italiane.
Duke analizuar pamjet e marra nga telekamerat e mbikqyrjes dy të burgosurit kanë kapërcyer murin rrethues në zonën e ajrimit. Njëri prej tyre në momentin e arratisjes ishte i zhveshur në pjesën e sipërme të trupit.
Hetimet e para të pamjeve të marra nga telekamerat e sigurisë flasin se dy të burgosurit shqiptarë nuk kanë pasur bashkëpunëtorë të tjerë që i kanë ndihmuar në arratisjen e tyre.
Sapo janë gjendur jashtë murit rrethues të burgut, dy të arratisur janë ndarë duke u larguar në drejtime të ndryshme. Sipas imazheve njëri prej tyre është larguar në drejtim të zonës së bregdetit, ndërsa tjetri drejt territorit të Aurelias.
Policia italiane ka shpërndarë në të gjithë Italinë fotografitë e dy shqiptarëve të arratisur, ndërsa 5 njësi operative të policisë të ndihmuar dhe nga një helikopter po mbikqyrin territorin përreth komunës së Civitavechias e në mënyrë të veçantë zonën përreth portit.
