Kryetarja e Lëvizjes Socialiste për Integrim, Monika Kryemadhi tha se ajo nuk do fare që të merret me Partinë Demokratike
“Ne tashmë kemi pozicionin tonë, kemi strategjinë tone”, tha Kryemadhi në një intervistë në “Top Channel”, ku shtoi se opozita nuk është çështje numrash, opozita është çështje morali. Ne kemi alternativat tona dhe për çdo alternativë apo propozim që do të na jepet ne do të shqyrtojmë dhe nëse ajo është në funksion të qytetarëve do ta përkrahim.
Kryemadhi specifikoi se vetëm LSI po bën opozitën që kërkon vendi, nisur edhe nga rasti i fundit me përjashtimin e këshilltarëve të saj pas miratimit të rritjes së çmimit të ujit të pijshëm nga bashkia e Tiranës.
Kryemadhi: Unë nuk dua të merrem fare me PD-në. Ne tashmë kemi pozicionin tonë, kemi strategjinë tonë, kemi platformën tonë, që është një koalicion i drejtpërdrejtë me qytetarët dhe në shërbim të qytetarëve. Opozita nuk është çështje numrash, opozita është çështje morali. Ne kemi alternativat tona dhe për çdo alternativë apo propozim që do të na jepet ne do të shqyrtojmë dhe nëse ajo është në funksion të qytetarëve do ta përkrahim. Por ajo çka duhet të them është që LSI-ja në pozicion e saj e ka të drejtpërdrejtë opozitë frontale pa asnjë lloj kompromisi. Frontale por edhe konstruktive. Sepse opozitë nuk do të thotë të thuash “jo” për çdo gjë, opozitë do të thotë të japësh alternativa, që janë në funksion të qytetarëve, janë për një jetë më të mirë për qytetarët dhe mbi të gjithë krijojnë një lloj stabiliteti, jo vetëm politik, por edhe stabilitet ekonomik, financiar dhe njerëzor, për të cilin shqiptarët kanë sot nevojë më shumë se kurrë.
