https://www.facebook.com/tiranatodaycom/videos/328332194278191/
Policia e Durrësit ka goditur një bandë që fuste drogë në ambientet e I.E.V.P. Durrës, pas përfundimit me sukses të operacionit “Psikologu” nga specialistët për Narkotikët.
Tre shtetas, mes tyre psikologu i burgut, janë arrestuar, si dhe janë sekuestruar heroinë, kokaine, kanabis, peshore elektronike, euro dhe para, si dhe telefona celularë.
Pas hetimeve dy mujore me metoda speciale, rezulton se këta tre shtatas janë të implikuar në gjashtë ngjarje.
Janë proceduar penalisht pesë shtetas, tre prej të cilëve janë arrestuar në flagrancë dhe dy shtetas të tjerë janë ndaluar.
Sipas policisë, personat e arrestuar në flagrancë janë shtetasit:
- Arjan Belishova 49 vjeç, banues në Durrës, Psikolog në I.E.V.P.Durrës
- Astrit Hushi 50 vjeç, banues në Durrës
- Saimir Zotkaj 32 vjeç, banues në Durrës, i burgosur në I.E.V.P.
Janë ndaluar me iniciativë shtetasit:
- Serxhio Shtjalshi 24 vjeç, banues në Durrës, shitës në I.E.V.P.Durrës;
- Sodiol Duma 38 vjeç, banues në Durrës.
Shtetasit e mësipërm, në bashkëpunim me njëri-tjetrin fusnin lëndë narkotike në ambientet e I.E.V.P.Durrës.
Si funksiononte banda në ambientet e burgut:
Astrit Hushi (i dyshuar në rolin e ndërmjetësit) siguronte lëndën narkotike tek shtetasi Sodiol Duma (i dyshuar në rolin e furnizuesit) dhe ia jepte shtetasit Arjan Belishova (i dyshuar në rolin e korrierit), me detyrë psikolog në I.E.V.P. Durrës , i cili e fuste në ambientet e burgut.
Arjan Belishova ia dorëzonte lëndën narkotike shtetasit Saimir Zotkaj, i cili është i burgosur në I.E.V.P. Durrës. Saimir Zotkaj (i dyshuar në rolin e shpërndarësit) e shpërndante lëndën narkotike në ambientet e I.E.V.P.
Serxhio Shtjalshi, punonjës në lokalin e I.E.V.P., merrte lekët nga shtetasi Saimir Zotkaj dhe ia jepte shtetasit Astrit Hushi, lekë me të cilat ky i fundit blinte lëndën narkotike dhe paguante psikologun.
Më datë 27.07.2017, shtetasi Astrit Hushi është kapur në flagrancë duke i dhënë lëndën narkotike shtetasit Arjan Belishova, të ndarë në doza, si edhe një sasi lekësh për punën që do kryente A. Belishova, duke e futur lëndën narkotike në ambientet e I.E.V.P.
Janë sekuestruar në cilësinë e provave materiale:
- 42.5 gr lëndë narkotike e dyshuar e llojt Heroinë;
- 13 gr lëndë narkotike e dyshuar e llojit Kokainë;
- 36 gr lëndë narkotike e dyshuar e llojit Cannabis Sativa;
- 2 peshore elektronike;
- 3 250 € dhe 27 500 lekë të reja;
- 5 telefona celularë.
Nga veprimet hetimore të kryera janë zbardhur dhe dokumentuar 6 ngjarje, ku shtetasit e mësipërm dyshohet se janë të implikuar, konkretisht si më poshtë vijojnë:
- Më datë 05.02.2017, në ambientet e I.E.V.P. Durrës janë gjetur dhe sekuestruar në cilësinë e provës materiale 68 gr. lëndë narkotike e dyshuar e llojit Cannabis Sativa.
- Më datë 19.02.2017, në ambientet e I.E.V.P., Durrës janë gjetur dhe sekuestruar në cilësinë e provës materiale 34 gr. lëndë narkotike e dyshuar e llojit Cannabis Sativa.
- Më datë 28.02.2017, në ambientet e I.E.V.P. Durrës janë gjetur dhe sekuestruar në cilësinë e provës materiale 110.5 gr. lëndë narkotike e dyshuar e llojit Cannabis Sativa.
- Më datë 18.03.2017, në ambientet e I.E.V.P. Durrës janë gjetur dhe sekuestruar në cilësinë e provës materiale 35.5 gr. lëndë narkotike e dyshuar e llojit Cannabis Sativa.
- Më datë 17.05.2017, në ambientet e I.E.V.P., Durrës janë gjetur dhe sekuestruar në cilësinë e provës materiale 34.5 gr. lëndë narkotike e dyshuar e llojit Cannabis Sativa.
- Më datë 05.07.2017, në ambientet e I.E.V.P. Durrës janë gjetur dhe sekuestruar në cilësinë e provës materiale 1.5 gr. lëndë narkotike e dyshuar e llojit Cannabis Sativa.
Hetimet vijojnë për shtetas të tjerë të implikuar në këtë veprimtari kriminale.
Materialet i kaluan Prokurorisë së Rrethit Gjyqësor Durrës, për veprime të mëtejshme për veprat penale “Prodhimi dhe shitja e narkotikëve”, “Futja ose mbajtja e sendeve të ndaluara në institucionin e vuajtjes së dënimit” dhe “Moskallëzimi i krimit” në bashkëpunim parashikuar në nenet 283/2, 324/a/2 dhe 300 të Kodit Penal.
