Ministri i Brendshëm, Dritan Demiraj ka përgëzuar aksionet e Policisë së Shtetit në Shkodër dhe Vlorë, për parandalimin e blerjes së votave, si dhe ka kërkuar që Policia e Shtetit të kryejë detyrën ligjore me përgjegjësi.
Gjithashtu, ministri u ka bërë thirrje punonjësve të Policisë së Shtetit që të qëndrojnë larg çdo veprimtarie të paligjshme zgjedhore gjatë ditës së zgjedhjeve dhe të zbatojnë detyrat që iu ngarkon ligji.
Në mbyllje, ministri u bën thirrje qytetarëve që të angazhohen për një proces zgjedhor të ndershëm dhe të denoncojnë çdo shkelje në numrin 0694137777 (me sms, WhatsApp, Viber), si dhe në numrin falas të Policisë së Shtetit 0800 0 129.
NJOFTIMI I PLOTË:
Ministri i Brendshëm Dritan Demiraj përgëzon të gjithë aktorët e përfshirë në këtë fushatë zgjedhore dhe veçanërisht qytetarët shqiptarë për zhvillimin e një fushate të qetë dhe përgjithësisht pa incidente serioze.
Ai inkurajon Policinë e Shtetit që të kryejë detyrën ligjore me përgjegjësi dhe përkushtim për garantimin e kushteve të nevojshme për të pasur një proces zgjedhor të qetë dhe të sigurt.
Ministri Demiraj përgëzon aksionet e Policisë në Shkodër dhe në Vlorë dhe kërkon nga Policia e Shtetit që të veprojnë në mënyrë më të vendosur ndaj personave të përfshirë në shit-blerje votash pa diskriminime partiake.
Ministri iu bën thirrje punonjësve të Policisë së Shtetit të qëndrojnë larg çdo veprimtarie të paligjshme zgjedhore gjatë ditës së zgjedhjeve.
Të zbatojnë me përpikmëri detyrat që iu ngarkon ligji për Policinë e Shtetit, Kodi Zgjedhor dhe Kodi Penal.
Monitorimi i veprimtarisë së tyre është dhe do të jetë i rreptë deri në përfundim të procesit.
Për çdo shkelje të konstuar masat do të jenë të ashpra për këdo të përfshirë në veprimtari të paligjshme.
Ministri i Punëve të Brendshme Dritan Demiraj u bën thirrje të gjithë qytetarëve që të angazhohen për një proces zgjedhor të ndershëm dhe të barabartë duke qenë aktiv në denoncimin e shkeljeve ligjore që kanë të bëjnë me përfshirjen e policisë në procesin zgjedhor apo për raste të shitblerjes së votës, intimidimit apo kërcënimit të votuesve dhe veprimeve të tjera të paligjshme.
Qytetarët janë të ftuar të denoncojnë në numrin e Ministrisë së Punëve të Brendshme 0694137777 (me sms, ËhatsApp, Viber), si dhe në numrin falas të Policisë së Shtetit 0800 0 129.
