Kreu i Partisë Demokratike ka zhvilluar një takim me banorët të Pogradecit. Gjatë fjalës së tij, Basha i mëshoi unit të tij, teksa siguroi qytetarët se do të jetë “kryeministri i halleve, zgjidhjeve dhe shpresës të qytetarëve”:
“Ju e dini se ekonomia është katastrofë, se shëndetësia është në kolaps total, ndaj kjo është koha t’i themi Edi Ramës ekonomia është shkatërruar, Shqipëria është mjerim, je ti që nuk e kupton!
Unë do të jem kryeministri juaj, i halleve, zgjidhjeve dhe shpresave të pogradecarëve të thjeshtë. Kryeministri Basha dhe Republika e Re do të investojë 100 mln euro për fermerët shqiptarë.”
Më tej, Lulzim Basha u shpreh se kryeministri Rama e refuzon debatin publik për shkak të frikës sepse nuk ka asnjë program për të prezantuar. Në mbyllje të fjalës së tij, Basha shtoi se LSI detyroi pogradecarët që të anëtarësohen në këtë parti në shkëmbim të një vendi pune, ndërsa bëri thirrje që qytetarët të braktisin ata që i mbajtën peng dhe të votojnë PD-në:
“Pse thoni se e refuzoi debatin Rama? A doni të ketë debat mes kreut të PD-së dhe kryeministrit?
Bilanc nuk ka, program nuk ka, kjo është frika e Ramës. Rrogat kanë rënë për herë të parë në 27 vite, kjo është arsyeja pse Rama nuk do debat me mua.
Po e kthen fushatën në shfaqje se nuk do debat me mua. Me ekonominë nuk merret, as me shëndetësinë, kjo është fushata e Ramës, vazhdim i teatrit të kukllave, të mos ju japë llogari e të vazhdojë të gënjejë.
Dil në debat, mos ki frikë, demokracia e meriton debatin!
Këtu në Pogradec ka qindra qytetarë që LSI i përdori si klientë, duke i marrë peng duke i detyruar të anëtarësohen në LSI për një vend pune. Koha e klientelizmit ka marrë fund, asnjë votë për ata që ju mbajtën peng. Votat për LSI-në janë vota në gjol, kthehuni në shtëpinë tuaj. Ndëshkojeni Ramën me votë dhe mos u jepni asnjë votë partive të tjera të pazarit.
Unë do jem kryeministri juaj, i halleve tuaja, i shpresave tuaja!”.
