Kryetari i Partisë Demokratike, Lulzim Basha, e cilësoi tërheqjen e kryeministrit Edi Rama nga zgjedhjet për bashkinë e Kavajës, si rezultat i forcës së opozitës. Ndërsa vuri në dukje se kjo nuk ishte aspak një lëmoshë apo dhuratë e kreut të qeverisë.
Duke folur nga “Çadra e Lirisë”, sipas ritualit të përditshëm politik, Basha shpjegoi se ishin qytetarët e Kavajës ata që refuzuan të përdoreshin nga mazhoranca qeverisësë.
Sipas Bashës, zgjedhjet vendore në Kavajë do të ishin një fasadë pasi ato ishin blerë më parë me paratë e krimit dhe drogës.
Ai tha se opozita ishte nisur dje për ta ccliruar Kavajën nga krimi, ashtu sicc do të bëjë javën e ardhshme për të çliruar gjithë vendin.
Basha i ftoi të gjithë javën e ardhshme për të marshuar në bulevard, për t’i treguar forcën kryeministrit Rama se sipas tij, nëse shqiptarët do të jenë të bashkuar përballë pushtetit të inkriminuar, nuk i ndal askush.
Fjala e plotë e Bashës:
Gjithçka u përmbys sepse e vetmja forcë që mund ta ndalë dhe të fitojë përballë krimit jeni ju. Janë shqiptarët e bashkuar që janë në këmbë dhe të vendosur në luftën ndaj krimit për të mbrojtur demokracinë në Kavajë dhe në gjithë Shqipërinë.
Kupola e politikës së vjetër ka miliarda euro në tenderë publikë. Në këtë lojë të madhe ku shitet dhe blihet, faktori politik, e vetmja forcë që mund t’i ndalë jeni ju, qytetarët e bashkuar. E vetmja forcë që mund të sjellë ndryshimin e vërtetë është bashkimi më i madh i zgjedhjeve të lira për liri e demokraci.
Tërheqja nga Kavaja nuk është dhuratë, nuk është lëmoshë, por është zmbrapsja e tmerruar nga projektimi më i madh i qytetarëve që ishte bërë gati të marshonte drejt Kavajës për ta çliruar atë, u tërhoq nga refuzimi i qytetarëve të Kavajës për t’u përdorur.
Dialogu do të ketë sukses kur bashkimi më i madh i shqiptarëve javën e ardhshme në këtë bulevard, do të marshojë këtu, ku shqiptarët nuk do të pranojnë zgjedhje të dominuar nga krimi dhe pa opozitën. Të vetmet zgjedhjet që ky vend do të mbajë do jenë zgjedhjet të çliruara nga krimi dhe krijimin e një qeverie teknike që do të realizojë zgjedhje të lira dhe të ndershme.
Ju keni arritur atë që nuk e keni arritur në 3 vite e gjysmë, nuk ia arriti ta bëjë as opozita. Mos e harroni këtë. Unë e di fare mirë. E kam ditur forcën e bashkimit të bashkëqytetarëve të mi dhe e shoh dritën e parë të Republikës së Re në sytë e fëmijëve, burrave dhe grave. Kjo ditë po vjen dhe askush nuk e ndal dot. Dita e Republikës së Re kur qytetarët do të kenë në duart e tyre fatin e tyre. Zoti është me të drejtën, është me shqiptarët. Kjo dritë do të vijë edhe më parë sa më shumë të jemi dhe sa më të bashkuar të jemi për t’i dhënë fund Republikës së Vjetër. I bëjmë thirrje çdo burri dhe gruaje, të riu e të e reje që të bashkohet në marshimin e javës së ardhshme, për të arritur zgjedhje të lira e të ndershme dhe për të sjellë Republikën e Re që po agon.
