Kreu i Partisë Demokratike mbajti një fjalim në “Çadrën e lirisë”, ku bëri thirrje për të marrë pjesë në protestën e së dielës në Kavajë.
Gjithashtu, Basha tha se më 7 maj rrëzohet Republika e Vjetër, duke i dhënë fund një republike fasadë, që drejtohet nga kriminelët.
FJALA E BASHËS:
“77 ditë pagëzojnë rekordin historik të këtij bashkim kombëtar për zgjedhje të lira e të ndershme për Republikën e Re. 77 ditë që kanë ndryshuar Shqipërinë, investim në të ardhmen që po vjen.
Më 18 shkurt u mblodhën qindra mijë shqiptarë, këtu, në këtë shesh për të marrë një vendim të madh. Vendimin për të mos ulur më kokën para arrogancës, padrejtësisë, hajdutërisë, për të mos u trembur nga krimi në pushtet, për t’i thënë “JO” teatrit të kukullave. Vendimin për të mos pranuar zgjedhje fasadë të diktuara nga krimi e nga droga, vendimin për të mos u bërë më as alibi dhe as fasadë e Republikës së Vjetër, vendimin për të marrë fatin në dorë.
Asgjë nuk është më si më parë, që nga ajo ditë e bekuar e bashkimit të 18 shkurtit. Bota mbarë e pa, e njohu vuajtjen e një kombi të tërë, thirrjen për t’u ngritur bashkë. Sot, në një takim që sapo mbarova, ajo që nuk pranohej si argument i mirëqenë, sot është fakt i certifikuar, falë jush, falë qëndresës suaj, falë këtij bashkimi. Zëri juaj i bashkuar, është sot e vetmja e vërtetë që njeh Amerika, Evropa dhe mbarë bota. E gjithë bota e di se zgjedhje të lira pa asgjësuar pushtetin e krimit dhe drogës, nuk ka.
Çdo shqiptar e di që zgjidhja mund të vijë vetëm duke marrë në dorë fatin e zgjedhjeve menjë qeveri teknike, që do të mundësojë zgjedhje të lira.
Sot është rasti të shpreh mirënjohjen time për të gjithë ata që qëndruam bashkë ditë pas dite duke rrëzuar fasadën e Republikës së Vjetër, vendosëm se zgjedhje pa opozitën nuk ka e nuk mund të ketë. Opozita qëndroi e bashkuar, siç ju dha fjalën ju, dhe refuzoi regjistrimin në një fasadë të shëmtuar elektorale të diktuar nga krimi dhe droga.
Edhe partitë qeveritarë nuk ia dolën të regj koalicionin, 18 qershori ka rënë politikisht, moralisht dhe ligjërisht.
Ndonëse rënia morale, politike dhe ligjore e 18 qershorit është një pakt i konfirmuar nga të gjithë, Republika e Vjetër po bën gjithçka ta ndalë apo ngadalësoj vrullin e bashkimit popullor.
Arsyet janë të qarta, ata janë një grusht njerëzish, ata janë Rroshët dhe Bushët dhe Nushët me shokë, kriminelë që u vodhën shqiptarëve 2.8 miliard euro.
Kjo është arsyeja pse studentët shqiptarë, duhet të paguajnë tarifa të larta nga viti në vit.
Përballja e parë është ditën e dielë në kryeqytetin e lirisë, në Kavajë. Nga Kavaja le të përhapet lajmi i mirë se Republika e Vjetër është e një grushti kriminelësh, le ta mësojë nga Kavaja çdo shqiptar dhe çdo mik i huaj se më 7 maj Republika e Vjetër rrëzohet në Kavajë.
Nuk do lejojmë, krimin, drogën, Rroshin dhe Kaposhin që të nëpërkëmbë Kavajën. Do jemi aty, për të diktuar agimin Republikës së Re. Tregojuni botës ku do jemi ditën e dielë!”/ TIRANA TODAY
