Presidenti i Partive Popullore Evropiane, Joseph Daul, i ka kërkuar kreut të Partisë Demokratike, Lulzim Basha, që të vijojë dialogun me kryeministrin Rama dhe të hyjë në zgjedhjet parlamentare të 18-qershorit.
Ky qëndrim i Daul vjen pas komunikimit nëpërmjet një video-konference me kryedemokratin, Lulzim Basha, mbrëmjen e sotme.
Mesazhi i Partive Popullore Evropiane:
Pas një bisede telefonike me kreun e Partisë Demokratike të Shqipërisë Lulzim Basha dhe grupin parlamentar të kësaj force politike, Presidenti i PPE Joseph Daul bëri deklaratën e mëposhtme:
“Kam pasur një shkëmbim të frytshëm dhe të sinqertë të pikëpamjeve me kreun e PD-së, Lulzim Basha dhe grupin parlamentar të PD-së. Objektivi i konferencës-video i ditës së sotme ishte para së gjithash, apeli që PD të kontribuojë në mënyrë konstruktive drejt një zgjidhjeje që përfshin PD-në në zgjedhjet e ardhshme parlamentare dhe në ruajtjen e qetësisë e të përmbajtjes nga çdo lloj dhune.
PPE dhe partia e saj anëtare PD-në ndajnë mendimin se një luftë më e fortë kundër drogës është vendimtare si për Shqipërinë ashtu edhe për BE-në. Unë përgëzoj PD-në tonë anëtare për qëndrimin e saj në luftën kundër drogës, të cilën e ka vendosur në krye të axhendës politike. Në lidhje me këtë, pajtohem dhe do të mbështes, që BE të forcojë monitorimin e zbatimit të planit të veprimit 2017-2020 për luftën kundër kultivimit dhe trafikimit të kanabisit. Për më tepër, BE duhet të forcojë mbështetjen e saj financiare për përfundimin e monitorimit ajror të të gjithë territorit shqiptar me qëllim identifikimin e plantacioneve të kanabisit dhe monitorimin e shkatërrimit të tyre.
Regjistrimi dhe pjesëmarrja në zgjedhjet e ardhshme të të gjitha palëve është e domosdoshme. Gjithashtu kam përsëritur se asnjë bojkot i zgjedhjeve apo i Parlamentit nuk janë aspak në përputhje me standardet e Bashkimit Evropian apo të PPE-së. Në këtë kontekst, unë u sigurova nga PD se partia do të angazhohet në negociata të mëtejshme konstruktive me shumicën qeverisëse në mënyrë që të gjejë një zgjidhje për këtë qëllim.
Për më tepër, theksova se kompromisi i propozuar nga nënpresidenti i PPE-së, David McAllister, javën e kaluar vendosi prioritetet e duhura për të siguruar që zgjedhjet të jenë në përputhje me standardet ndërkombëtare. Në këtë drejtim, u bëj thirrje të gjitha palëve të angazhohen sinqerisht në gjetjen e një zgjidhjeje politike”.
