Gjykata ka caktuar masën e sigurisë me “arrest shtëpie” për Mimoza Margjekën, e akuzuar për korrupsion.
Ndërsa do të lihen në “arrest në burg” bashkëshorti i saj Arben Cara dhe dy të tjerët, Nejton Bali dhe Klaudjo Zhilla. “Arrest shtëpie” u vendos edhe për avokatin Skënder Demiraj.
Mimoza Margjeka akuzohet se është pjese e një skeme korrupsioni, ku nëpërmjet burrit të saj ajo ka marrë 6 mijë euro për të ndryshuar masën e sigurisë të një të dënuari.
Ata akuzohen se janë bërë pjesë e nje skeme korrupsioni prej 6 mijë eurosh për lirimin e të paraburgosurit Orion Bali, ndaj të cilit rëndonte akuza e “dhënies ndihmë për kalim të paligjshëm të kufirit”.
Pas përfundimit të seancës së sigurisë ndaj gjyqtares, avokati mbrojtës tha se do ta ndjekin në rrugë ligjore, pasi sipas tij, nuk ka asnjë çështje.
“Këtu nuk ka çështje. Ne do të ndjekim rrugën ligjore. Çështja është brenda ligjit. Nuk ka absolutisht, të zbatohet një masë represive e tillë, hetimi le të vazhdojë. I bëj thirrje medias të futet në proces”, tha ai.
