Transferimi i shekullit duket se do ti nxjerrë shpenzimet e bëra për ta sjellë në Itali në kohë rekord. Bëhet fjalë për blerjen e bujshme të Juventusit, që për 105 milionë euro arriti të sillte në Torino Cristiano Ronaldon. Por ajo që ka ndodhur në 24 orët e para, pas zyrtarizimit të kësaj marrëveshje është çmenduri. Siç raporton “Yahoo Italia”, 520.000 tifozë kanë blerë bluzën e CR7, pasi ato filluan të shiten në dyqane fizike dhe online.Në Milano, çmenduria shkoi edhe aty ku sipas statistikave, çdo minutë shitej një fanellë e portugezit. Rreth 500.000 janë shitur online, ndërsa 20.000 janë blerë në dyqanet zyrtare të Juventusit dhe Adidasit. Me një kosto mesatare rreth 104 euro, Juventusi mund të ketë arkëtuar rreth 54 milionë euro, sipas shifrave paraprake, më shumë se gjysma që është paguar për Ronaldon, 105 milionë euro.