Prej më shumë se një muaji, energjia kryesore e policisë, është harxhuar në menaxhimin e protestave të shumta të opozitës, të cilat jo rrallë janë shoqëruar me akte dhune. Vetëm javën e fundit, 5 persona janë vrarë në atentate të paramenduara: 2 në Tiranë, 1 në Shkodër, 1 në Elbasan dhe 1 në Kavajë.
Dy prej vrasjeve, ishin fryt i konflikteve të vjetra, autorët e të cilave janë arrestuar. Tre vrasjet më të bujshme ajo e Jurgen Kurtit, Ferdinand Polias dhe avokatit Ravik Gurra, dyshohet se janë kryer me vrasës me pagesë, që zakonisht nuk lënë shumë gjurmë. Në Shqipëri, atentatet dhe vrasje ndodhin në çdo periudhë të vitit, por shpeshtohen gjatë sezonit të pushimeve verore, festave fundvitit, dhe sidomos gjatë situatave të ndezura politike.
Ndërsa mazhoranca dhe opozita, janë ende larg uljes në tryezën e bisedimeve, janë shtuar paralajmërimet për destabilitet dhe përplasje civile. Teksa kjo situatë parashikohet të zgjasë me muaj, për krimin është një moment i artë që të rinisë larjen e hesapeve. Çdo të enjte, mbi 2 mijë policisë angazhohen përreth parlamentit, për të garantuar mbarëvajtjen e seancës plenare, pa llogaritur shërbimet inteligjente.
Nëse nuk do të kishim këtë krizë të prodhuar nga politika, shumica e tyre do të ishin diku tjetër. Duke gjurmuar nisjen e ndonjë dërgese me drogë drejt Italisë, apo parandaluar vrasjen e radhës, pas së cilës ka viktima, makina të djegura periferive të qyteteve, dhe autorë që zhduken përherë në errësirën e natës…/ TIRANA TODAY
