Një mjeke gjinekologe në spitalin e Beratit është proceduar penalisht ditën e sotme. Specialistët e Seksionit për Hetimin e Krimit Ekonomik e Financiar në DVP Berat, pas një hetimi 5 mujor, nën drejtimin e Prokurorisë Pranë Gjykatës së Shkallës së Parë Berat, bënë të mundur dokumentimin me prova ligjore të përfitimit në menyrë të parregullt në disa raste të vlerave monetare nga mjekja gjinekologe E.Sh, pranë Spitalit Rajonal Berat.
Në sajë të hetimeve, rezultoi se kjo mjeke, gjatë kryerjes së vizitave dhe operacioneve të lindjes, merrte vlera monetare nga familjarët e shtetaseve që i nënshtroheshin operacionit për të kryer lindjen.
Po kështu u procedua penalisht edhe shtetasja me inicialet M.G, e cila i ofroi një shumë parash mjekes për të kryer operacionin për kunatën, me qëllim lindjen e fëmijës.
Nën drejtimin e Prokurorisë, vijon puna për dokumetimin e plotë ligjor. Materialet i kaluan Prokurorisë së Rrethit Gjyqësor Berat, për veprime të mëtejshme për veprat penale “Shpërdorimi i detyres”, “Korrupsioni pasiv i personave që ushtrojnë funksione publike”, dhe “Korrupsioni aktiv i personave që ushtrojnë funksione publike”.
