Gjykata Kushtetuese ka shtyrë sërish dhënien e vendimit për shkarkimin e presidentit Ilir Meta. Seanca është shtyrë në 7 shkurt, në orën 10:00 për vijim e seancës për shkarkimin e Ilir Metës, pasi trupa gjykuese i ka adresuar përfaqësuesve ligjorë të Presidencës 72 pyetje në total. Nga ana tjetër, përfaqësuesit e kreut të shtetit kërkuan kohë për t’ju përgjigjur këtyre pyetjeve. Një reagim ka ardhur nga Meta, i cili thotë se brenda 48 orëve jo vetëm do të dorëzojnë 72 përgjigjet, por personalisht si President i Republikës do ua lexoj të gjithë qytetarëve përgjigjen për çdo pyetje, nga Institucioni i Kryetarit të Shtetit.
Ja se çfarë shkruan Meta
Falenderoj Këshilltarët e mi për punën e shkëlqyer, që kanë bërë gjatë farsës gjyqësore të iniciuar nga ish-Kuvendi monist dhe antikushtetues.
Pasi u njoha me 72 pyetjet e anëtarëve të Gjykatës Kushtetuese, brenda 48 orëve jo vetëm do të dorëzojmë 72 përgjigjet, por personalisht si President i Republikës do ua lexoj të gjithë qytetarëve të Republikës përgjigjen për çdo pyetje, nga Institucioni i Kryetarit të Shtetit.
Mirë u takofshim sonte në ora 21:00 në “Frontline”, në NEWS 24.
